നവീകരണ പ്രസ്ഥാനക്കാരോടുള്ള ചില സംശയങ്ങള്‍: Dr. Skylark

പത്തു മുപ്പതു കൊല്ലം മുമ്പേ ഉള്ളതാണ് ഓശാന എന്ന പ്രസിദ്ധീകരണം. പാലായിലെ പുസ്തക കടകളില്‍ നിന്നും പലപ്പോഴും ഞാനത് വാങ്ങി വായിച്ചിട്ടുണ്ട്. അതിന്റെ എഡിറ്റര്‍ ആയ ജോസെഫു സാറിന്റെ പല പ്രസംഗങ്ങളും ഞാന്‍ കേട്ടിട്ടുണ്ട്. പാല രൂപതയിലെ പല സുറിയാനി പള്ളികളിലും എന്തെങ്കിലും പ്രശ്നം നടക്കുമ്പോള്‍ അദ്ദേഹം ഓടി എത്തി പ്രതിഷേധ യോഗം നടത്തി അനീതിക്കെതിരെ പ്രതികരിക്കുമായിരുന്നു. അദ്ദേഹം സുറിയാനി കത്തോലിക്കാ സഭക്കെതിരെ ഉന്നയിച്ചിട്ടുള്ള പല ആരോപണങ്ങളിലും വ്യക്തിപരമായി ഞാന്‍ അനുകൂലിക്കുന്നുവെങ്കിലും അദ്ദേഹത്തിന്റെ ഒരു ആരാധകന്‍ ആയിട്ടില്ല ഇതുവരെ. എന്ന് കരുതി കത്തോലിക്കാ വൈദികര്‍ പറയുന്ന കാര്യങ്ങളൊക്കെ വേദ വാക്യം എന്ന് കരുതി കണ്ണുമടച്ച് അനുസരിക്കുന്ന ഒരു കുഞ്ഞാടല്ല ഞാന്‍. നവീകരണ പ്രസ്ഥാനത്തെ പറ്റി കേട്ടിട്ട് തോന്നിയ ചില അഭിപ്രായങ്ങള്‍ ഞാന്‍ ഇവിടെ പ്രകടിപ്പിക്കുന്നതില്‍ നിങ്ങള്‍ ആരും വിസമ്മതിക്കുക ഇല്ല എന്ന് കരുതട്ടെ.

ഇന്നേ വരെ നവീകരണ പ്രസ്ഥാനത്തെ പറ്റി ഒരു ശെരിയായ വിവരണം ആര്‍ക്കും കിട്ടിയിട്ടില്ല എന്നത് ആണ് സത്യം. അതിനെ പറ്റി ജെനങ്ങളെ അറിയിക്കുന്നതില്‍ അതിന്റെ പിന്നില്‍ പ്രവര്‍ത്തിക്കുന്നവര്‍ക്ക് ചില പരിമിതികള്‍ ഉണ്ടെന്നു ഞാന്‍ സമ്മതിക്കുന്നു. എനിക്ക് നവീകരണ പ്രസ്ഥാനത്തെ പറ്റി മനസിലായ കാര്യങ്ങള്‍ ഇവയാണ്.

1.ആദിമ ക്രിസ്ത്യന്‍ സഭയില്‍ നടന്നത് പോലെ സ്വത്തു കൈകാര്യം ചെയ്യുന്നത് അല്‍മായ  പ്രതിനിധികള്‍ കൂടി ഉള്‍പ്പെട്ട ഒരു സമിതി ആയിരിക്കണം. അല്മായര്‍ക്കും സഭാ സ്വത്തുക്കളുടെ മേല്‍ അധികാരം ഉണ്ടായിരിക്കണം. ഇത് കേള്‍ക്കുമ്പോള്‍ വളരെ സുഖമുള്ള വാദഗതി ആണെങ്കിലും അതിനു ചില പോരായ്മകള്‍ ഉണ്ടെന്നാണ് എനിക്ക് തോന്നുന്നത്. ഇക്കാര്യത്തില്‍ അല്മായര്‍ മാത്രമായി സ്വത്തു കൈകാര്യം ചെയ്യുന്നതിനേക്കാള്‍ എനിക്ക് വിശ്വാസം വൈദികനെ തന്നെ custodian ആക്കുന്നത് ആണ്. ഇതാണ് ഒരു ശരാശരി കത്തോലിക്കന്റെ മനസ്ഥിതി. സഭാ സ്വത്തുക്കള്‍ അന്യാധീനപ്പെടാതിരിക്കാന്‍ അവയെല്ലാം ബിഷപ്പിന്റെ പേരില്‍ തന്നെ നില നിറുത്തുന്നത് ആണ് നല്ലത്.  അല്മായര്‍ക്കും അല്മായര്‍ എന്ന് പറയുന്ന രാഷ്ട്രീയക്കാര്‍ക്കും കട്ട് തിന്നാന്‍ എന്തിനു അവസരം കൊടുക്കുന്നു? അല്മായര്‍ കൈകാര്യം ചെയ്യുക ആണെങ്കില്‍ അത് എങ്ങിനെ വേണമെന്ന കാര്യത്തില്‍ ഇത് വരെ ഒരു formula ഉണ്ടാക്കിയിട്ടില്ല. വികാരിയെ സഹായിക്കാന്‍ ഇപ്പോള്‍ തന്നെ ഒരു ഭരണ സമിതി ഉണ്ട്. ഇടവകയില്‍ നിന്നും തിരഞ്ഞെടുക്കപ്പെടുന്നവര്‍ തന്നെ ആണ് അതിലെ members. അവര്‍ അവരുടെ കര്‍ത്തവ്യം ശെരിയായി നിര്‍വഹിക്കുന്നില്ല എന്ന് ആരോപണം ഉണ്ടെങ്കില്‍ അതിന്റെ പരിഹാരം ഈ വ്യവസ്ഥിതി മാറ്റുക എന്നതല്ല. ആദിമ സഭയിലെ പോലെ വേണം എന്നാണെങ്കില്‍ സുറിയാനി സഭയെ മാത്രം എന്തിനു കുറ്റപ്പെടുത്തുന്നു? അതും പാലായെയും, ചെങ്ങനാശേരിയെയും, കാഞ്ഞിരപ്പള്ളിയെയും, തൃശ്ശുരിനെയും മാത്രം തിരഞ്ഞു പിടിച്ചു?. ഇതിലുള്ള ദുരൂഹത മാറ്റെണ്ടിയത് അല്ലെ?

2. പല പള്ളികളിലും ബൈബിളില്‍ എഴുതിയിരിക്കുന്നതിനു വിപരീതമായി പല പ്രാര്‍ത്ഥനകളും നടക്കുന്നു. ആഘോഷമായ തിരുനാളുകള്‍, നോവേനകള്‍, ധ്യാന പ്രസംഗങ്ങള്‍, വിശുദ്ധന്മാരുടെ പേരില്‍ നടത്തുന്ന സ്ത്രോത്ര കാഴ്ചകള്‍ തുടങ്ങിയവയും മറ്റു അനാചാരങ്ങളും അന്ധവിശ്വാസങ്ങളും നിര്‍ത്തലാക്കണം എന്നാണ് ആവശ്യം. ഇതൊക്കെ  നിയമം കൊണ്ട് നിര്‍ത്തലാക്കാന്‍ പറ്റുന്ന കാര്യങ്ങള്‍ അല്ല എന്നാണ് എനിക്ക് തോന്നുന്നത്. പക്ഷെ വിശ്വാസികളെ ബോധവല്‍ക്കരിക്കുന്നതിനു നവീകരണം എന്ന പേരില്‍ ഒരു പ്രസ്ഥാനം വേണമെന്ന് തോന്നുന്നില്ല.

3. ഇപ്രകാരം ഉള്ള ആവശ്യങ്ങള്‍ അംഗീകരിചില്ലെങ്കില്‍ എന്ത് ചെയ്യുമെന്ന് വ്യക്തമല്ല. abortion നെ അനുകൂലിച്ചു ചില അമേരികന്‍ പള്ളികളില്‍ കയറി പ്രകടനക്കാര്‍ തിരു ഓസ്തി നശിപ്പിച്ച സംഭവങ്ങള്‍ വായിച്ചിട്ടുണ്ട്. അത് പോലെ എന്തെങ്കിലും പരിപാടികള്‍ കേരളത്തിലെ പള്ളികളില്‍ നടത്തിയാല്‍ വിശ്വാസികള്‍ അത് നോക്കി ഇരിക്കുകയില്ല. ഇപ്രകാരം പ്രകടനം നടത്തുന്നവര്‍ക്ക് നല്ല അടി കിട്ടാനും സാധ്യത ഉണ്ട്. തലമുറകള്‍ ആയി മനസ്സില്‍ ഏറ്റു വാങ്ങിയിട്ടുള്ള ചില വിശ്വാസങ്ങള്‍, അവ അന്ധവിശ്വാസം ആയിക്കോട്ടെ, എന്തുമായിക്കോട്ടെ, അതൊന്നും അത്ര പെട്ടെന്ന് മായിച്ചു കളയാന്‍ പറ്റുമെന്ന് തോന്നുന്നില്ല. സിമിന്റിനെക്കാളും ഉറച്ചതായി പോയ വിശ്വാസങ്ങള്‍ ആണ് അവയെല്ലാം.

4. കഴിഞ്ഞ പല നൂറ്റാണ്ടുകളിലും എല്ലായിടത്തെയും പോലെ കത്തോലിക്കാസഭയിലും പല അനാചാരങ്ങളും അതിക്രമങ്ങളും നടന്നിട്ടുണ്ട്. അതെല്ലാം നടന്ന സമയം ഈ പറയുന്നവര്‍ പോലും ക്രിസ്ടിയാനികള്‍ ആയിരുന്നോ എന്ന കാര്യത്തില്‍ സംശയം ഉണ്ട്. അതെല്ലാം ഇപ്പോള്‍ പൊക്കിപിടിച്ചു ഇന്നുള്ള മാര്‍പാപയെയും ബിഷപ്പുമാരെയും വൈദികരെയും പറ്റി മോശമായി എഴുതുന്നതിനും പറയുന്നതിനും കാരണമാക്കുന്നത് അത്ര നല്ല കാര്യം ആയി എനിക്ക് തോന്നിയിട്ടില്ല. ഒരു ക്രിസ്ടിയാനിക്കും തോന്നുക ഇല്ല. സാമൂഹ്യമായ കാരണങ്ങള്‍ കൂടാതെ മറ്റു പല കാരണങ്ങളും കൂടി അതിനുണ്ട്. നിങ്ങള്‍ കുറ്റപ്പെടുത്തുന്നതും തെറി വിളിക്കുന്നതും ആയ ബിഷപ്പിനും വൈദികനും കന്യാസ്ത്രീക്കും അടുത്ത ബന്ധുക്കളായി വളരെ അധികം ആളുകള്‍ ഉണ്ട്. ആ വൈദികശ്രേഷ്ടരെ ഒക്കെയും ഞങ്ങള്‍ എല്ലാം വളരെ അധികം സ്നേഹിക്കുന്നു, ബഹുമാനിക്കുന്നു, വിശ്വസിക്കുന്നു. അവര്‍ക്ക് എന്തെല്ലാം കുറ്റവും കുറവുകളും ഉണ്ടെങ്കിലും അത് ഞങ്ങള്‍ സഹിച്ചോളാം. അവര്‍ പറയുന്നതിനെ ആണ് നിങ്ങള്‍ പറയുന്നതിനേക്കാള്‍ ഞങ്ങള്‍ കൂടുതല്‍ വില കല്‍പ്പിക്കുന്നത്, വിശ്വസിക്കുന്നത്. അവിടെയും ഇവിടെയും നടക്കുന്ന ഒറ്റ തിരിഞ്ഞ ചില sexual abuse ഇന്റെയും പണം തട്ടിപ്പിന്റെയും കാര്യങ്ങള്‍ പറഞ്ഞു ഒരു institution തകര്‍ക്കാന്‍ ശ്രമിക്കുന്നത് നല്ല നടപടി ആണെന്ന് തോന്നുന്നില്ല.

5. നവീകരണ പ്രസ്ഥാനത്തിന്റെ പിന്നില്‍ പ്രവര്‍ത്തിക്കുന്നവരുടെ biodata പരിശോധിച്ചതില്‍ ഭൂരിഭാഗം പേരും അമേരിക, UK, ജെര്‍മനി പോലത്തെ സമ്പന്ന രാജ്യങ്ങളില്‍ വളരെ സുഭിക്ഷമായി കഴിയുന്നവര്‍ ആണ്. ജീവിതത്തില്‍ അവര്‍ വേണ്ടരീതിയില്‍ വിജയം വരിച്ചു എന്ന് വേണം കരുതാന്‍. സഭയുടെതായ യാതൊരു സഹായവും അവര്‍ക്കിനി വേണം എന്ന് തോന്നുന്നില്ല. അവര്‍ ജീവിച്ചതോ ജീവിക്കുന്നതോ ആയ സാഹചര്യം അല്ല കേരളത്തിലെത്. കേരളത്തിലെ കാര്യങ്ങള്‍ പറയുവാനും തീരുമാനം എടുക്കുവാനും പ്രവാസികള്‍ ആയ നിങ്ങള്‍ക്ക് എന്ത് അവകാശം? എന്ത് അധികാരം? കേരളത്തിലെ സഭയുടെ കാര്യങ്ങള്‍ കേരളത്തില്‍ ഉള്ളവര്‍ തീരുമാനിച്ചു കൊള്ളും, അതിനെ ഓര്‍ത്തു നിങ്ങള്‍ ആരും വേവലാതി പെടേണ്ട.കേരളത്തിലെ സുറിയാനി കത്തോലിക്കാ സഭയെ ഇന്നുള്ള രീതിയില്‍ ആക്കി കെട്ടിപ്പടുക്കാന്‍ പ്രവാസികള്‍ ആരുടെയെങ്കിലും പണമോ അദ്ധ്വാനമോ ഉണ്ടായിട്ടില്ല.

6. നിങ്ങള്‍ പറയുന്നതായ ഗൌരവതരമായ ഒരു ആരോപണം ഇവിടുത്തെ കത്തോലിക്കാസഭ സ്വാശ്രയസ്ഥാപനങ്ങള്‍ നടത്തുന്നു. അങ്ങനെ ധാരാളം പണം ഉണ്ടാക്കുന്നു എന്നൊക്കെ ആണ്. അവ കൂടാതെ ആശുപത്രികള്‍, അനാഥ ശാലകള്‍, വൃദ്ധമന്ദിരങ്ങള്‍, എയിഡ്സ്  രോഗികളെ പോലും ശുശ്രൂഷിക്കുന്ന ആതുരസ്ഥാപനങ്ങള്‍ ഒക്കെ സഭ നടത്തുന്നു. ആ വക സ്ഥാപനങ്ങള്‍ ഉള്ളത് കൊണ്ട് കേരളത്തിലെ ശരാശരി കത്തോലിക്കന് വളരെ അധികം പ്രയോജനം ഉണ്ടായിട്ടുണ്ട്. അഡ്മിഷന് കോഴ വാങ്ങുന്നു എന്ന ആരോപണം വെറും ബാലിശമാണ്. വളരെ സുതാര്യമായ രീതിയില്‍ ആണ് അതിലെ കാര്യങ്ങള്‍ നടക്കുന്നത്. അല്ലെന്നുണ്ടെകില്‍ ആര്‍ക്കും കോടതിയെ സമീപിക്കാം. ഇന്ത്യയില്‍ വളരെ ശക്തമായ ഒരു നീതിന്യായ വ്യവസ്ഥ ഉള്ളത് കൊണ്ട് സ്വാശ്രയ സ്ഥാപനങ്ങള്‍ നടത്തി ആര്‍ക്കെങ്കിലും തട്ടിപ്പ് നടത്തി രക്ഷപെടാമെന്നു എനിക്ക് തോന്നുന്നില്ല. അത് മതനേതാക്കള്‍ ആണെങ്കില്‍ പോലും. നവീകരണക്കാരായ പ്രവാസികളോട് എനിക്കൊരു അപേക്ഷ കൂടി ഉണ്ട്. നിങ്ങള്‍ കുറെ സ്വാശ്രയസ്ഥാപനങ്ങള്‍, കോളേജുകള്‍, ആശുപത്രികള്‍, അനാഥശാലകള്‍, വൃദ്ധമന്ദിരങ്ങള്‍ എന്നിവ ഒക്കെ നടത്തി നിങ്ങള്‍ ആരോപണം ഉന്നയിക്കുന്നതായ ബിഷപ്പുമാരോട് ധൈര്യമായി പറയുക 'ഇങ്ങനെ ആണ് സ്ഥാപനങ്ങള്‍ നടത്തേണ്ടിയത്' എന്ന്. കേരളത്തിലെ കുറെ അധികം ആളുകള്‍ക്ക് അത് കൊണ്ട് പ്രയോജനവും കിട്ടും, സഭാ മേലധികാരികളെ തോല്‍പ്പിക്കുകയും ചെയ്യാം.

ഇതില്‍ ഉന്നയിച്ചിട്ടുള്ള കാര്യങ്ങള്‍ ഒരു ചര്‍ച്ചക്ക് വെച്ചാല്‍ നന്നായിരുന്നു.

(Dr. Skylark-നു വേണ്ടി Administrator പോസ്റ്റ്‌ ചെയ്തത്).