ഹൃദയഭേദകം, ആ കാഴ്ച! - ചെങ്ങളം പള്ളി തകര്ക്കല്‍)))

ചെങ്ങളം പള്ളിയുടെ അന്ത്യനിമിഷങ്ങള്‍ പകര്‍ത്തിയ വീഡിയോ ക്ലിപ്പിംഗ്‌സിന്റെ കാഴ്ച ഹൃദയഭേദകമായിരുന്നു. ബാബറി മസ്ജിദ് തകര്‍ക്കുന്ന കാഴ്ച ഇത്ര ഭീകരമായിരുന്നില്ലല്ലോ എന്നോര്‍ക്കുന്നു. ഒരു നൂറ്റാണ്ടുകാലംമുമ്പ് സ്ഥലവും പണവും ഉരുപ്പടികളുമെല്ലാം ദാനംചെയ്തും വിയര്‍പ്പൊഴുക്കിയും ഈ പള്ളി പണിതുയര്‍ത്തിയ ചെങ്ങളം പ്രദേശത്തെ കാരണവന്മാരെയും അവരുടെ പാവനസ്മരണയെയുംപോലും നിന്ദിക്കുന്ന തരത്തിലുള്ളതായിപ്പോയി, ഈ പുരോഹിതധിക്കാരം എന്നു പറയാതിരിക്കാനാവില്ല. മൂന്നു-നാലു തലമുറകളുടെ ആരാധാനാലയമെന്നനിലയില്‍ പ്രൗഢമായ സേവനം കാഴ്ചവെച്ച ചരിത്രമുള്ള ഒരു പള്ളിയെ കൊന്നുകൊലവിളിക്കുന്ന കാഴ്ചകണ്ട് പള്ളിവിശ്വാസികളല്ലാത്തവര്‍പോലും അന്ധാളിച്ചുപോയിട്ടുണ്ടാകും. അതുകൊണ്ടാകാം, ഈ പള്ളിയുമായി പ്രത്യേക ആത്മബന്ധമൊന്നുമില്ലാത്ത 'അല്‍മായശബ്ദം' വായനക്കാരും ഈ സംഭവത്തില്‍ വളരെ രോഷത്തോടെ പ്രതികരിച്ചത്.

കമന്റുകളില്‍ ഇടവകക്കാരുടെ പ്രതികരണശേഷിയില്ലായ്മയെ പലരും കുറ്റപ്പെടുത്തിക്കണ്ടു. എന്തുകൊണ്ട് ഇടവകക്കാര്‍ വികാരിക്കെതിരെ സംഘടിച്ചില്ല, എന്തുകൊണ്ടു കോടതിയില്‍ പോയില്ല എന്നൊക്കെ പലരും ചോദിച്ചുകണ്ടു. ഇടവകക്കാരുടെ പള്ളിയോഗം ചേര്‍ന്നാണ് പള്ളി പൊളിക്കലും പണിയലും ഒക്കെ തീരുമാനിക്കുന്നത് എന്നതിനാല്‍, വികാരിയെ ഇതില്‍ കുറ്റപ്പെടുത്തുന്നതില്‍ അര്‍ത്ഥമില്ലെന്നുള്ള പ്രതികരണവും കണ്ടു.

ഈ സാഹചര്യത്തില്‍, ചെങ്ങളം പള്ളി പൊളിക്കുന്നതിനെതിരെ നടന്ന ചില നീക്കങ്ങളെക്കുറിച്ച് എനിക്കറിവുള്ള ചില കാര്യങ്ങള്‍ 'അത്മായശബ്ദം' വായനക്കാരെ അറിയിക്കണമെന്നു വിചാരിക്കുന്നു:

ആദ്യമേ പൊതുയോഗത്തെപ്പറ്റി പറയാം പൊതുയോഗത്തില്‍ പള്ളി പൊളിക്കുന്നതിനെതിരെ വളരെപേര്‍ ശബ്ദമുയര്‍ത്തുകയുണ്ടായി. മിനിട്‌സ് ബുക്കില്‍ വിയോജനക്കുറിപ്പ് എഴുതാന്‍പോലും വികാരി. റവ. ഫാ. മാത്യു പുതുമന സമ്മതിച്ചില്ല. അതിന് പള്ളിനിയമത്തില്‍ വകുപ്പില്ലത്രേ! (മെത്രാന്മാര്‍ തിരുത്തിയെഴുതിയ പള്ളിയോഗനടപടിക്രമങ്ങള്‍ അനുസരിച്ച്, പള്ളിയോഗങ്ങള്‍ക്ക് തീരുമാനങ്ങളെടുത്തു നടപ്പാക്കാന്‍ അധികാരമില്ല എന്ന കാര്യം പലര്‍ക്കും അറിഞ്ഞുകൂടാ. നിലവില്‍, പള്ളിയോഗത്തിന് ഉപദേശാധികാരം മാത്രമേയുള്ളു എന്നതാണ് സത്യം) ഇതേത്തുടര്‍ന്ന് പള്ളിപൊളിക്കുന്നതിനെതിരെ 110 ഇടവകക്കാരുടെ ഒപ്പോടെ കാഞ്ഞിരപ്പള്ളി മെത്രാന് നിവേദനം കൊടുത്തു. അദ്ദേഹം ഒരു നടപടിയുമെടുത്തില്ല. 2011 ജൂലൈ 14-ന്, ചെങ്ങളം മുന്‍ ഇടവകക്കാരനും ഇപ്പോള്‍ വിദേശത്തുള്ളയാളുമായ ശ്രീ. ജോസ് തോട്ടിപ്പാട്ട് ഈ വിഷയത്തില്‍ ഇടപെടണമെന്ന് അപേക്ഷിച്ച് മേജര്‍ ആര്‍ച്ചുബിഷപ്പിനു കത്തയച്ചിരുന്നു. ജര്‍മ്മനിയില്‍നിന്നുള്ള ഇന്റര്‍നെറ്റ് മാസികയായ 'സോള്‍ ആന്റ് വിഷ'ന്റെ 2011 ആഗസ്റ്റ് ലക്കത്തില്‍, ഇതില്‍ ഇടപെട്ട് പരിഹാരം ഉണ്ടാക്കേണ്ടതിന്റെ ആവശ്യകത വിശദീകരിച്ച് മേജര്‍ ആര്‍ച്ചുബിഷപ്പ് മാര്‍ ആലഞ്ചേരിയ്ക്ക് ഒരു തുറന്നകത്തു പ്രസിദ്ധീകരിക്കുകയുണ്ടായി. അദ്ദേഹവും ഒരു നടപടിയും സ്വീകരിച്ചില്ല.

ഇതിനിടെ, വികാരി ചതുരുപായങ്ങളും പ്രയോഗിച്ച്, എതിര്‍ത്തവരുടെ വായടപ്പിക്കുന്നതില്‍ വിജയിച്ചു.(ഈ 'വായടപ്പിക്കല്‍ വിദ്യ'യാണെന്നു തോന്നുന്നു, സെമിനാരികളിലെ മുഖ്യ പാഠ്യവിഷയം) അവസാനം, വന്ദ്യവയോധികരായ രണ്ടു മുന്‍ അദ്ധ്യാപകര്‍മാത്രം അവശേഷിച്ചു. അവര്‍ കേരളസംസ്ഥാന ആര്‍ക്കിയോളജിക്കല്‍ ഡിപ്പാര്‍ട്ട്‌മെന്റിലേക്ക്, ചെങ്ങളം പള്ളിക്ക് ആര്‍ക്കിയോളജിക്കല്‍ ആയ പ്രാധാന്യമുണ്ടോ എന്നു പരിശോധിക്കണമെന്നും ഉണ്ടെങ്കില്‍ ആ നിലയ്ക്ക് അതിനെ സംരക്ഷിക്കാന്‍ നടപടി സ്വീകരിക്കണമെന്നും ആവശ്യപ്പെട്ട് നിവേദനം നല്‍കി. കൂടാതെ, മുമ്പു സൂചിപ്പിച്ച ശ്രീ. ജോസ് തോട്ടിപ്പാട്ട്, 'സോള്‍ ആന്റ് വിഷന്‍' എഡിറ്റര്‍ ശ്രീ. ജോര്‍ജ്ജ് കട്ടിക്കാരന്‍ (ജര്‍മ്മനി), ചെങ്ങളം മുന്‍ ഇടവകക്കാരായ ഫാ. ടി. സെബാസ്റ്റ്യന്‍ (തിരുവണ്ണാമല, തമിഴ്‌നാട്), ശ്രീ. ജോര്‍ജ് കുറ്റിക്കാട്ട് (ജര്‍മ്മനി), ശ്രീ. മാത്യു ജോസഫ് എന്നിവരും ആര്‍ക്കിയോളജിക്കല്‍ ഡിപ്പാര്‍ട്ട്‌മെന്റിന് പള്ളി സംരക്ഷണമെന്നഭ്യര്‍ത്ഥിച്ച് നിവേദനങ്ങള്‍ നല്കി. ഇതേത്തുടര്‍ന്ന ഒക്‌ടോബര്‍ 25-ന് കേരള കത്തോലിക്കാ സഭാനവീകരണപ്രസ്ഥാന(KCRM)ത്തിന്റെ ആഭിമുഖ്യത്തില്‍, ഞങ്ങളും ആര്‍ക്കിയോളജിക്കല്‍ വകുപ്പില്‍ നിവേദനം സമര്‍പ്പിക്കുകയുണ്ടായി. കൂടാതെ അന്നുതന്നെ അതിന്റെ കോപ്പി സഹിതം കോട്ടയം ജില്ലാ കളക്ടര്‍ക്കും ഒരു നിവേദനം നല്‍കി. (ഈ നിവേദനങ്ങള്‍ വായിക്കാന്‍ ഇവിടെ ക്ലിക്ക് ചെയ്യുക)

ഇതിന്റെയൊക്കെ ഫലമായിട്ടായിരിക്കാം, 'ആര്‍ക്കിയോളജി ഡിപ്പാര്‍ട്ട്‌മെന്റില്‍നിന്നും അനുമതി ഉണ്ടാകും വരെ പള്ളി പൊളിക്കാന്‍ പാടില്ല' എന്നുകാണിച്ച് കളക്‌ട്രേറ്റില്‍നിന്നും വികാരിക്ക് നിരോധനാജ്ഞ നല്‍കപ്പെട്ടു. പള്ളി പൊളിക്കുന്നതു സംബന്ധിച്ച് ആലോചിക്കാന്‍ തൊട്ടടുത്ത ഞായറാഴ്ച വികാരി പൊതുയോഗം നിശ്ചയിച്ചു. ഇതറിഞ്ഞതുകൊണ്ടും, കാഞ്ഞിരപ്പള്ളി മെത്രാന്റെ രാഷ്ട്രീയസ്വാധീനശക്തിയെപ്പറ്റി കേട്ടറിവുള്ളതുകൊണ്ടും, അതിനുമുമ്പേ ഹൈക്കോടതിയെ സമീപിച്ച് ഒരു സ്റ്റേ ഓര്‍ഡര്‍ വാങ്ങുന്നതിനെക്കുറിച്ചാലോചിക്കാന്‍ ഉടന്‍തന്നെ KCRM ചെയര്‍മാന്‍ ശ്രീ. കെ. ജോര്‍ജ് ജോസഫും ഈ ലേഖകനും കൂടി, പൊന്‍കുന്നത്ത്, ഇക്കാര്യത്തില്‍ അനുഭാവിയാണെന്നറിയാവുന്ന ഒരു വക്കീലിനെ സമീപിക്കുകയുണ്ടായി. എന്നാല്‍, കുറഞ്ഞത് 10,000/ രൂപയെങ്കിലും ഉടന്‍ മുടക്കേണ്ടിവരുമെന്നു അദ്ദേഹം പറഞ്ഞപ്പോള്‍ അതിനുള്ള ഫണ്ടില്ലാതിരുന്ന ഞങ്ങള്‍ നിരാശരായി മടങ്ങുകയായിരുന്നു. തിരിച്ചുപോരുംവഴി, സന്ധ്യയോടെ പള്ളിയുടെ ഏതാനും ഫോട്ടോകള്‍ എടുക്കാന്‍ പള്ളിമുറ്റത്തെത്തുകയും, ഭരണങ്ങാനം പള്ളിയുടെയും അരുവിത്തുറ പളളിയുടെയുമൊക്കെ തലയെടുപ്പോടെ ആകാശം നിറഞ്ഞുനില്‍ക്കുന്ന അതിമനോഹരമായ ചെങ്ങളം പള്ളി നേരില്‍ക്കാണുകയും ചെയ്തു.JCB ഉപയോഗിച്ച്, അടിത്തറയോടുചേര്‍ന്നുള്ള പള്ളിനടകള്‍ തകര്‍ത്തുമാറ്റിയിരുന്നു എന്ന പന്തികേടേ ഉണ്ടായിരുന്നുള്ളു. പള്ളിയുടെ ഏതാനും ഫോട്ടോകള്‍ എടുത്തപ്പോഴേക്കും, 'ആരോടു ചോദിച്ചിട്ടാണ് പള്ളിമുറ്റത്തു കയറി ഫോട്ടോ എടുത്തത്?' എന്നാക്രോശിച്ചുകൊണ്ട് രണ്ടുപേര്‍ ഓടിയെത്തി. പള്ളിയുടെ മേല്‍ക്കൂര ഉള്‍പ്പെടെ പള്ളിക്കെട്ടിടം മൊത്തം ലേലത്തില്‍ പിടിച്ച കൈക്കാരന്മാരായിരുന്നു, അവര്‍. 'വഴിയാത്രക്കാരാണ്, ഉടനെ പൊളിച്ചുകളയാന്‍ പോകുന്ന പള്ളിയാണെന്ന് വാര്‍ത്ത കണ്ടതുകൊണ്ട് ഈ വഴി പോയപ്പോള്‍ ഒന്നു കണ്ടിട്ടുപോകാമെന്ന് കരുതിയെന്നേയുള്ളൂ' എന്നു നല്ലവാക്കു പറഞ്ഞു തിരിച്ചുപോരുകയായിരുന്നു, ഞങ്ങള്‍.

അടുത്ത ദിവസംതന്നെ, ആര്‍ക്കിയോളജിക്കല്‍ ഡിപ്പാര്‍ട്ട്‌മെന്റ് നിയോഗിച്ചതനുസരിച്ച് ഒരു ഉദ്യോഗസ്ഥന്‍ ചെങ്ങളം പള്ളിയില്‍ എത്തുകയുണ്ടായി. എന്നാല്‍, നിവേദനം നല്‍കിയ ആരെയും അദ്ദേഹം ക്ഷണിക്കുകയോ ആശയവിനിമയം നടത്താന്‍ അവസരമുണ്ടാക്കുകയോ ചെയ്തില്ല. ഒരു നടപടിക്രമം പൂര്‍ത്തീകരിച്ചതായി വരുത്തിത്തീര്‍ക്കുക മാത്രമാണ്, ആര്‍ക്കിയോളജിക്കല്‍ ഡിപ്പാര്‍ട്ട്‌മെന്റ് - അതോ അവര്‍ നിയോഗിച്ച ഉദ്യോഗസ്ഥനോ? - ചെയ്തത് എന്നുതോന്നുന്നു. ഏതായാലും, ആര്‍ക്കും അറിവില്ലാതിരുന്ന ഒരു ആര്‍ക്കിയോളജിക്കല്‍ സവിശേഷത ചെങ്ങളം പള്ളിക്കുണ്ടായിരുന്നു എന്ന് ആ ഉദ്യോഗസ്ഥന്‍ കണ്ടെത്തിയെന്നാണ് അറിയാന്‍ കഴിഞ്ഞത്. പള്ളിയുടെ അടിത്തറ കെട്ടിയിരുന്നത് കരിങ്കല്ലിനുപകരം വെട്ടുകല്ലുമാത്രം ഉപയോഗിച്ചായിരുന്നുവത്രെ! ഈ വാദം അച്ചനുമായുള്ള വിലപേശലിനായി ഉയര്‍ത്തപ്പെട്ടതായിരുന്നുവെന്നും പിന്നീട് കേട്ടു.

ഏതായാലും, നല്ല കാതലും കനവുമുള്ള ശീലാന്തികളും ഉത്തരങ്ങളും കഴുക്കോലുകളും കട്ടിളകളും വാതില്‍പാളികളും ഉള്‍പ്പെടെ ലേലത്തില്‍ പിടിച്ചിരുന്ന കൈക്കാരന്മാരെക്കൂടി നിരാശിതരാക്കിക്കൊണ്ട്, തൊട്ടടുത്ത ദിവസംതന്നെ ഡൈനാമിറ്റുകള്‍ പൊട്ടുകയായിരുന്നു. പള്ളി തകര്‍ന്നുവീണയുടന്‍തന്നെ, ആര്‍ക്കിയോളജി വകുപ്പിനു നിവേദനംകൊടുത്ത രണ്ട് ഇടവകക്കാരില്‍ 80 വയസ്സുള്ള ജോസഫ് സാര്‍ ഫോണില്‍വിളിച്ചു ഗദ്ഗദകണ്ഠനായി പറഞ്ഞു: 'ഇനി ഒന്നും ചെയ്യേണ്ട. എല്ലാംകഴിഞ്ഞു ഡൈനാമിറ്റ് വെച്ചാണ് കഥ കഴിച്ചത്! ഒരക്ഷരം മിണ്ടാനാകാതെ ഞെട്ടിത്തരിച്ചിരുന്നു പോയി, ഞാന്‍. വീഡിയോ ക്ലിപ്പിംഗ്‌സ്് കണ്ടപ്പോള്‍ ശരീരം മുഴുവന്‍ അരിച്ചുകയറിയതും അതേ ഞെട്ടല്‍ത്തന്നെ!

സഭയിലിന്ന് ഇത്തരം ധാരാളം സംഭവങ്ങള്‍ നടന്നുവരുന്നു. അന്ധവിശ്വാസംകൊണ്ടും ഭയംകൊണ്ടും മാത്രമല്ല വിശ്വാസിസമൂഹം ഇവിടെയെല്ലം തോറ്റുപോകുന്നത്. മറിച്ച്, നൈയാമികമായി വിശ്വാസികള്‍ക്ക് യാതൊരു അധികാരവും സഭയിലില്ല എന്നതുകൊണ്ടുകൂടിയാണ്. എല്ലാ പ്രതികരണങ്ങളെയും നിര്‍വീര്യമാക്കാനുളള അധികാരം, നിയമങ്ങള്‍ സ്വയം സൃഷ്ടിച്ച് പൗരോഹിത്യം ഉണ്ടാക്കിയിരിക്കുയാണ്. അതുകൊണ്ട്, ആ സാഹചര്യം മാറ്റിയെടുക്കുക എന്നുള്ളതാണ് പ്രധാനം. ഭാരത നസ്രാണി സഭയുടെ സഭാഭരണസംവിധാനമായിരുന്ന പള്ളിയോഗസമ്പ്രദായത്തിന്റെ ചുവടുപിടിച്ച് നിയമപരിഷ്‌കരണകമ്മീഷന്‍ രൂപംകൊടുത്ത 'ചര്‍ച്ച് ആക്ട്' നടപ്പിലാക്കിത്തരണമെന്ന് ധാരാളം സ്വതന്ത്രക്രൈസ്തവസംഘടനകള്‍ ഗവണ്‍മെന്റിനോട് ഇന്നാവശ്യപ്പെടുന്നത് അതുകൊണ്ടാണ് 'ചര്‍ച്ച് ആക്ട്' പാസ്സാക്കിക്കുന്നതില്‍ വിശ്വാസികള്‍ വിജയിച്ചാല്‍പ്പിന്നെ, അധികാരമുള്ള പള്ളിയോഗങ്ങളാവും സഭയുടെ എല്ലാതലങ്ങളിലും സ്വത്തുക്കളും സ്ഥാപനങ്ങളും സംബന്ധിച്ച കാര്യങ്ങള്‍ കൈകാര്യം ചെയ്യുക...... അവരുടെ കൂട്ടായ വിവേകത്തില്‍ കൂടിയാലോചിച്ചു തീരുമാനിക്കാതെ ഒരു പള്ളിയും പൊളിക്കാനോ പണിയാനോ അപ്പോള്‍ ഒരച്ചനും സാധ്യമാവില്ല. അഡ്മിഷനും നിയമനത്തിനും കോഴ വാങ്ങാനും അവര്‍ക്കാവാത്ത സാഹചര്യം അന്നുണ്ടാവും.

ജോര്‍ജ്ജ് മൂലേച്ചാലില്‍