സ്ത്രീകള്ക്ക് അള്ത്താരയില്‍ പ്രവേശനം നല്കാന്‍ കാലം വൈകി

ലോകത്ത് ആദ്യമായി സ്ത്രീപുരുഷ സമത്വം അംഗീകരിച്ച യേശുക്രിസ്തുവിന്റെ പേരിലുള്ള ക്രൈസ്തവ സഭകള്‍ പള്ളികളിലെ അള്‍ത്താരകളില്‍ സ്ത്രീകള്‍ക്കു പ്രവേശനം അനുവദിക്കാന്‍ ഇരുപത്തൊന്നാം നൂറ്റാണ്ടിലെങ്കിലും തയ്യാറാവണമെന്നു ജസ്റ്റിസ് കെ.ടി. തോമസ് ആവശ്യപ്പെട്ടു.

മാര്‍ത്തോമ്മാസഭയില്‍ ഡോ. യൂഹാനോന്‍ മാര്‍ത്തോമ്മായുടെ കാലത്ത് വനിതകളെ പള്ളിയില്‍ വേദപാഠം വായനയ്‌ക്കൊക്കെ അനുവദിച്ചു. പക്ഷേ സഭയില്‍ അവര്‍ക്ക് ഇന്നും മദ്ബഹയില്‍ പ്രവേശനമില്ല. ഇങ്ങനെയുള്ള ഒരു പള്ളിയില്‍ ഇന്നു ക്രിസ്തു വന്നാല്‍ മദ്ബഹയില്‍ പ്രവേശിക്കുമോ എന്ന് കെ. ടി. തോമസ് ചോദിച്ചു. ഇന്ത്യയിലെ പ്രഥമ പൗരനാകാന്‍ ഒരു വനിതയ്ക്കും സുപ്രീം കോടതിയില്‍ ജഡ്ജിമാരാകാന്‍ മൂന്നു വനിതകള്‍ക്കും കഴിയുന്ന ഇക്കാലത്ത് നമ്മുടെ വനിതകള്‍ക്കു പള്ളിയുടെ പ്രധാന സ്ഥാനങ്ങളില്‍ പ്രവേശനം നിഷേധിക്കുന്നതിനെ തോമസ് ചോദ്യം ചെയ്തു.

വ്യഭിചാരത്തിനു പിടിക്കപ്പെട്ട സ്ത്രീയെ തന്റെ മുന്നില്‍ കൊണ്ടുവന്നപ്പോള്‍ ക്രിസ്തു പറഞ്ഞത് അവരെയല്ല, അവരെ ഇതിലേക്കു വലിച്ചിഴച്ച പുരുഷന്മാരെയാണ് കുറ്റപ്പെടുത്തേണ്ടതെന്നാണ്. അവരെ ക്രിസ്തു വിളിച്ചത് പാപം ചെയ്തവളെ എന്നല്ല, മകളെ എന്നാണ്. എന്നാല്‍ ബൈബിളിന്റെ പല മലയാള തര്‍ജമകളിലും മകളെ എന്നതിനു പകരം സ്ത്രീയെ എന്നാണ് തെറ്റായി ചേര്‍ത്തിരിക്കുന്നതെന്നു ജസ്റ്റിസ് തോമസ് പറഞ്ഞു.

മാര്‍ത്തോമ്മാ വൈദികസെമിനാരിയില്‍ ഏബ്രഹാംമല്‍പാന്‍സ്മാരക പ്രഭാഷണം നടത്തുകയായിരുന്നു സുപ്രീം കോടതിയിലെ മുന്‍ ജഡ്ജി. മല്‍പാന്‍ 175 വര്‍ഷം മുമ്പ് ആരംഭിച്ച നവീകരണം ഒരു തുടര്‍പ്രക്രിയ ആവണമെങ്കില്‍ മാര്‍ത്തോമ്മാ സഭ ഇത്തരം കാര്യങ്ങളെപ്പറ്റി ആലോചിക്കണമെന്ന് അദ്ദേഹം പറഞ്ഞു.

വിശുദ്ധ കുര്‍ബാനയുടെ ഭാഗമായി അപ്പവും വീഞ്ഞും നല്‍കുന്ന രീതി യിലെ അശാസ്ത്രീയതയെപ്പറ്റി സഭാംഗങ്ങളായ വിദഗ്ദ്ധ ഡോക്ടര്‍മാര്‍ ചൂണ്ടിക്കാട്ടിയ കാര്യങ്ങള്‍ സഭാനേതൃത്വം പരിഗണിക്കാതിരിക്കുന്നതിനെ അദ്ദേഹം വിമര്‍ശിച്ചു. ഒരു പള്ളിയില്‍ മുന്നൂറോളം പേര്‍ വരെ ചില ഞായറാഴ്ചകളില്‍ കുര്‍ബാന കൈക്കൊള്ളും. ഇത്രയും പേര്‍ക്ക് അപ്പവും വീഞ്ഞും വൈദികര്‍ വായില്‍ വെച്ചുകൊടുക്കുമ്പോള്‍ ഒരാളുടെ വായിലെ ഉമിനീരും തുപ്പലും അടുത്തയാളുടെ വായില്‍ എത്തുന്നു. ഇവരെല്ലാവരുടെയും തുപ്പല്‍ വൈദികന്റെ കയ്യിലേക്കുമെത്തുന്നു. ഇതുമൂലം ഒരാള്‍ക്കുളള രോഗങ്ങള്‍ മറ്റുള്ളവരിലേക്ക് പകരാന്‍ കാരണമാകുമെന്നാണ് ഡോക്ടര്‍മാര്‍ നിവേദനത്തില്‍ പറഞ്ഞത്. വാഴ്ത്തപ്പെട്ട അപ്പം വിശ്വാസികളുടെ കയ്യില്‍ കൊടുക്കുകയും വീഞ്ഞ് ചെറിയ കപ്പുകളിലാക്കി കൊടുക്കുകയും ചെയ്യാമെന്നും ഈ ഡോക്ടര്‍മാര്‍ നിര്‍ദേശിച്ചിരുന്നു.

മദ്ബഹയില്‍ ബിഷപ്പും വൈദികരുമുള്ളപ്പോള്‍ അവര്‍ക്കിടയില്‍ മാത്രം കൈവയ്പും കൈയസൂരി കൈമാറുകയും അവിടെയുള്ള അത്മായ ശുശ്രൂഷകര്‍ക്ക് അതു നിഷേധിച്ച് അവരെ താഴ്ന്ന വര്‍ഗക്കാരാക്കുകയും ചെയ്യുന്നത് തന്നെ വേദനിപ്പിക്കുന്നുണ്ടെന്ന് അദ്ദേഹം പറഞ്ഞു. ക്രിസ്തു ഇന്നിവിടെ ഉണ്ടായിരുന്നെങ്കില്‍ ഈ വിവേചനം അനുവദിക്കുമായിരുന്നോ?

അന്നത്തെ അറിവുവച്ച് എഴുതിയ കാര്യങ്ങള്‍ കാലോചിതമായി പരിഷ്‌കരിക്കാതെ നവീകരണത്തിനു തുടര്‍ച്ചയുണ്ടാവില്ല.

ഭൂതങ്ങളെ പുറത്താക്കണമെന്നു വേദപുസ്തകത്തില്‍ പറഞ്ഞിട്ടുണ്ട്. എന്നാല്‍ ഇപ്പോള്‍ മന:ശാസ്ത്രം വളര്‍ന്നതോടെ ഭൂതങ്ങളെപ്പറ്റിയുള്ള ചിന്തകള്‍ തലച്ചോറിലുണ്ടാകുന്ന പ്രത്യേകതരം മാറ്റങ്ങളാണെന്നു ശാസ്ത്രീയമായി തെളിയിച്ചിട്ടുണ്ട്. ഇത് വേദപുസ്തക വ്യാഖ്യാനങ്ങളിലും വേദപുസ്തകത്തിലും അവതരിപ്പിക്കണം.

ഭൂമി പരന്നതാണെന്നു സഭ പഠിപ്പിച്ചപ്പോള്‍ ഭൂമി ഉരുണ്ടതാണെന്നു പറഞ്ഞ ഗലീലിയോയെ ശിക്ഷിച്ച ക്രിസ്തീയസഭ 16 വര്‍ഷം മുന്‍പ് അദ്ദേ ഹത്തെ മുന്‍കാല പ്രാബല്യത്തോടെ കുറ്റ വിമുക്തനാക്കിയത് എല്ലാ സഭകള്‍ക്കും മാതൃകയാവേണ്ടതാണെന്നും ജസ്റ്റിസ് തോമസ് പറഞ്ഞു.

വൈദിക സെമിനാരി മുന്‍ പ്രിന്‍സിപ്പല്‍ റവ. എം.വി.ഏബ്രഹാം. പ്രിന്‍സിപ്പല്‍ റവ. ഡോ. ഗീവര്‍ഗീസ് മാത്യു, റവ സണ്ണി മാത്യു എന്നിവര്‍ പ്രസംഗിച്ചു.

(കടപ്പാട് : മലയാള മനോരമ, 2011 നവംബര്‍ 19)

അനുചിന്തനം:                     ജോസഫ് പുലിക്കുന്നേല്‍

ക്രിസ്തു ജനിച്ചു വളര്‍ന്ന ഇസ്രായേല്‍ സമൂഹത്തില്‍ പേട്രിയാര്‍ക്കിക്കല്‍ സിസ്റ്റം (പുരുഷ മേധാവിത്വം) ആണ് നിലനിന്നിരുന്നത്. സ്ത്രീകള്‍ പൊതുവെ വീട്ടില്‍ ഒതുങ്ങിക്കഴിഞ്ഞിരുന്നു. യേശു ഈ പുരുഷ മേധാവിത്വത്തിനെതിരെ ശക്തമായി പ്രതികരിച്ചതായി കാണാം. വ്യഭിചാരം ചെയ്താല്‍ സ്ത്രീകളെ കല്ലെറിഞ്ഞു കൊല്ലാം. എന്നാല്‍ സ്ത്രീയെ വ്യഭിചാരത്തിലേക്കു നയിച്ച പുരുഷനു ശിക്ഷയില്ല.

യേശുവിന്റെ ജീവിതത്തില്‍ യേശുവിനോട് പരസ്യമായി സ്‌നേഹവും അനുകമ്പയും കാണിച്ച അനേകം സ്ത്രീകളുണ്ടായിരുന്നു. ലാസറിന്റെ സഹോദരിമാരായ മര്‍ത്ത, മറിയം, മഗ്ദലനമറിയം എന്നിങ്ങനെ പോകുന്നു അവരുടെ ലിസ്റ്റ്. അവിടുന്ന് വേശ്യകളോടും ചുങ്കക്കാരോടുമൊത്ത് ജീവിക്കുന്നു എന്നായിരുന്നല്ലോ ഫരിസേയരുടെ ആരോപണം.

കുര്‍ബാന ക്രിസ്തുവിന്റെ പരമപരിഹാരബലിയുടെ ഓര്‍മയാചരണമാണ്. മിശിഹായുടെ കുരിശുമരണത്തിനു തലേനാള്‍ യേശു ശിഷ്യര്‍ക്കു കൊടുത്ത വിരുന്നു സല്‍ക്കാരം (പെസഹാ ആചരണം ആയിരുന്നില്ല) അന്നുവരെ ആചരിച്ചുപോന്ന ചിഹ്നാത്മക പെസഹായുടെ നിരാകരണമായിരുന്നു. പെസഹായ്ക്ക് ചുട്ടെടുത്ത ആടും പുളിപ്പില്ലാത്ത അപ്പവും നിര്‍ബന്ധമായിരുന്നു. മാത്രമല്ല വീഞ്ഞ് നിഷിദ്ധവുമായിരുന്നു. ''കര്‍ത്താവ് അഹറോനോട് അരുള്‍ ചെയ്തു: 'മരണത്തിന്നിരയാകാതിരിക്കേണ്ടതിന്നു, സമ്മേളനക്കൂടാരത്തില്‍ പ്രവേശിക്കുമ്പോള്‍, നീയും നിന്റെ പുത്രന്മാരും വീഞ്ഞോ മറ്റു ലഹരിപാനീയങ്ങളോ കുടിക്കരുത്. ഇതു നിങ്ങളുടെ തലമുറകള്‍ക്കെല്ലാം ഒരു ശാശ്വതനിയമമായിരിക്കും'' (ലേവി. 10: 8, 9).

ഈ നിയമം ലംഘിച്ചുകൊണ്ടാണ് യേശു മരണത്തിനു തലേദിവസം ശിഷ്യര്‍ക്കു നടത്തിയ വിരുന്നു സല്‍ക്കാരത്തില്‍ വീഞ്ഞ് വിളമ്പിയത്.

യേശുവിനെ കുരിശിലേറ്റാന്‍ വിധിച്ചപ്പോള്‍ പുരുഷ ശിഷ്യന്മാര്‍ എല്ലാംതന്നെ ഓടി മറഞ്ഞു. പക്ഷേ സ്ത്രീകള്‍ കുരിശിന്‍ ചുവട്ടില്‍ യേശുവിനോടൊപ്പം നിന്നു. ''ഗലീലയില്‍ നിന്ന് യേശുവിനെ അനുഗമിക്കയും അവനെ ശുശ്രൂഷിക്കയും ചെയ്തിരുന്ന അനേകം സ്ത്രീകള്‍ അകലെ ഇതെല്ലാം നോക്കിക്കൊണ്ടു നിന്നിരുന്നു. മഗ്ദലക്കാരി മറിയമും യാക്കോബ്, യോസേഫ് എന്നിവരുടെ അമ്മയായ മറിയമും സെബദിപുത്രന്മാരുടെ അമ്മയും അക്കൂട്ടത്തില്‍ ഉണ്ടായിരുന്നു'' (മത്താ. 27 : 55,56). അവനുവേണ്ടി വിലപിക്കാന്‍ സ്ത്രീകളെ ഉണ്ടായിരുന്നുള്ളൂ. ''അവനെക്കുറിച്ചു വിലപിക്കയും കരയുകയും ചെയ്യുന്ന സ്ത്രീകളടക്കം വലിയ ഒരു ജനക്കൂട്ടം അവനെ അനുഗമിച്ചു.'' (ലൂക്കോ. 23: 26). ''അങ്ങനെ പടയാളികള്‍ അതു ചെയ്തു. യേശുവിന്റെ കുരിശിന്നടുക്കല്‍ അവന്റെ അമ്മയും അവന്റെ അമ്മയുടെ സഹോദരിയും ക്ലെയോപ്പാസിന്റെ ഭാര്യയായ മറിയമും മഗ്ദലക്കാരി മറിയമും നിന്നിരുന്നു'' (യോഹ. 19: 25).

യേശു സംസ്‌കരിക്കപ്പെട്ടതിനുശേഷം ഒറ്റ പുരുഷനും കല്ലറ സന്ദര്‍ശിച്ചില്ല. ''ശാബത്തിന്നുശേഷം, ആഴ്ചയുടെ ഒന്നാം ദിവസം അതിരാവിലെ മഗ്ദലക്കാരി മറിയമും മറ്റേമറിയമും കല്ലറ സന്ദര്‍ശിക്കാന്‍ ചെന്നു'' (മത്താ. 28 : 1). (കാണുക. മര്‍ക്കോ. 16 : 1, ലൂക്കോ 24 : 10, യോഹ. 20 :1) അങ്ങനെ യേശുവിന്റെ മരണത്തിനും പുനരുത്ഥാനത്തിനും സാക്ഷികളായ സ്ത്രീകളെ യേശുവിന്റെ പരമപരിഹാരബലിയുടെ ഓര്‍മയാചരണാവസരത്തില്‍ മദ്ബഹായില്‍ പ്രവേശിപ്പിക്കാന്‍ അനുവദിക്കാത്തത് ശരിയാണോ എന്ന് ചിന്തിക്കേണ്ടിയിരിക്കുന്നു. പുരുഷ മേധാവിത്വം ചരിത്രത്തെ അവരുടേതാക്കി മാറ്റുന്നു.

(Hosana, December 2011 Issue)