കുര്ബാ്നയ്ക്ക് എന്താ വില?

 കുര്‍ബാനയ്ക്ക് എന്താ വില?

ജെ. മണക്കുന്നേല്‍

(2011 ഡിസംബര്‍ മാസത്തിലെ കുടുംബജ്യോതിസില്‍ വന്ന ലേഖനമാണ് താഴെ കൊടുക്കുന്നത്)

''മുപ്പതു കുര്‍ബാനയ്ക്ക് ഇവിടെ എന്താവില?'' കുര്‍ബാനയ്ക്കു കുറഞ്ഞവില അമ്പേഷിച്ചു വന്ന ഉപഭോക്താവിനെ ഞാനൊന്നു നോക്കി. മൂത്തമുരിങ്ങക്കായ്ക്കു മുഖംവെച്ചപോലെയൊരു സ്ത്രീരൂപം. ''ഇവിടത്തെ കുര്‍ബാനയ്ക്ക് വില നിശ്ചയിക്കാനാവില്ലല്ലോ.'' ഞാനുരിയാടി. ''അപ്പുറത്തെ പള്ളിയില്‍ വലുതിന് നൂറും ചെറുതിന് അമ്പതുമെന്ന് അറിഞ്ഞു. ഇവിടെ കുറവുണ്ടെങ്കില്‍ തരാനായിരുന്നു...'' കീറിത്തുന്നിയ പഴകിയ പണപ്പേഴ്‌സ് തുറക്കാനാഞ്ഞുകൊണ്ട് ആ പട്ടിണിപ്പാതി പറഞ്ഞു.  നരച്ചു നിറംകെട്ട സാരിയും പിഞ്ചിപിടിവള്ളിവിട്ട ചെരുപ്പുമണിഞ്ഞെത്തിയ ആ 'വിവരമില്ലാത്ത' വിശ്വാസിയെ ഞാന്‍ കസേരയിലിരുത്തി. കുര്‍ബാന ഈശോയുടെ കൂദാശയാണെന്നും. അതിനു വില ചോദിക്കാന്‍ നമ്മളാരുമല്ലെന്നും, നമ്മുടെ സമര്‍പ്പണത്തിന്റെ ഭാഗമായി ഒരു തുക ധര്‍മ്മമായി നല്കുന്നതിനെ വിലയായി കണക്കാക്കരുതെന്നുമുള്ള 'വിലയേറിയ' ഉപദേശങ്ങള്‍ ഞാന്‍ കുറെനേരം വിളമ്പി. വിളറി വിയര്‍ത്തിരിക്കുന്ന ആ വിശ്വാസിനിയോടു വിശദവിവരങ്ങള്‍ ആരാഞ്ഞു.

ദലിത് വിഭാഗത്തിലുള്ള ആ സ്ത്രീയെ കെട്ടിടംപണിക്കിടയില്‍ കണ്ടുമുട്ടിയ ഒരുവന്‍ കെട്ടാനൊരുമ്പെട്ടതും,. കൂട്ടിക്കൊണ്ടുപോയി കൂടെപ്പൊറുപ്പിച്ച് രണ്ടു കുട്ടികളുണ്ടായതും. എട്ടുംപൊട്ടും തിരിയാത്ത കുട്ടികളെയും കെട്ടിയവളെയും അവന്‍ പെട്ടെന്നൊരുദിവസം വിട്ടുപോയതുമായ കഥ പറയവേ അവര്‍ പൊട്ടിക്കരഞ്ഞു. ആത്മഹത്യ ചെയ്യാതിരുന്നത് ആരുടെയോ ഉപദേശപ്രകാരംകൂടിയ വചനധ്യാനത്തിന്റെ ചൈതന്യത്തിലാണ് എന്നും പ്രാര്‍ത്ഥിച്ചും വചനം വായിച്ചും കഴിഞ്ഞ  സ്ത്രീ ഒടുവിലാവേശപൂര്‍വ്വം മാമ്മോദീസാ സ്വീകരിച്ചു. ആറാണ്ടിന്റെ വിശ്വാസ പാരമ്പര്യമേ ഉള്ളൂ. രണ്ടുവര്‍ഷംമുമ്പൊരു രണ്ടാംകെട്ടുകാരന്‍ ക്രിസ്ത്യാനി പള്ളിയില്‍വെച്ചവളെ പരിഗ്രഹിച്ചു. ഒരു വര്‍ഷം ആകുംമുമ്പ് അവന്‍ കെട്ടിടത്തിനുമുകളില്‍നിന്നു വീണു നട്ടെല്ലു തകര്‍ന്നു കിടപ്പായി! ആശ്വാസം തേടി ഒരു ധ്യാനമന്ദിരത്തിലെത്തി. 'കരുണയില്ലാത്ത ഒരു കൗണ്‍സിലര്‍ ബ്രദര്‍' കഠിനതകര്‍ച്ചയുടെ കാരണം കണ്ടുപിടിച്ചു. മുമ്പു മരിച്ച മൂന്നു കുടുംബാംഗങ്ങളുടെ 'ആത്മാക്കള്‍' അവളുടെ ശരീരത്തിലൂടെ 'അലസഗമനം' നടത്തുന്നുണ്ടത്രേ! പരലോകത്തു പാര്‍ക്കാന്‍ തക്കപരിശുദ്ധി ഇല്ലാത്തതിനാല്‍ അവര്‍ പട്ടിണിയും പരിവട്ടവുമായി, ഈ പാവപ്പെട്ടവളുടെ അസ്ഥികൂടത്തിനുള്ളിലാണത്രേ ആവേശിച്ചിരിക്കുന്നത്!! മൂന്നുപേര്‍ക്കുംകൂടി പത്തുവീതം മുപ്പതു കുര്‍ബാന ചൊല്ലിച്ചാല്‍ ഇത്തിരി ശമനം കിട്ടിയേക്കും. ബ്രദറിനെ പണം ഏല്പിച്ചാല്‍ അയ്യായിരം രൂപയില്‍ തീര്‍ക്കാമത്രേ..... പണമില്ലാത്തതുകൊണ്ട് ഒന്നും കൊടുത്തില്ല. അത്രയും ഭാഗ്യം!! പലിശപട്ടിണിപടികയറിയ കുടുംബത്തെ പോറ്റാന്‍ പാടുപെടുന്നതിനിടയില്‍ സ്വരുക്കൂട്ടിയ മുഷിഞ്ഞ നോട്ടുകളുമായി കുറഞ്ഞവിലയുള്ള കുര്‍ബാനയും തേടിയിറങ്ങിയ ആ പാവംസ്ത്രീയെ ഞാന്‍, കൗണ്‍സെലിങ് തട്ടിപ്പുകളുടെ പൊരുള്‍ പറഞ്ഞു മനസ്സിലാക്കി. ഒടുവിലൊരു ആശ്വാസത്തിനായി ഒരു കുര്‍ബാനയില്‍ സംബന്ധിക്കാനും അതിനുള്ള ധര്‍മ്മംമാത്രം നല്കാനും ഉപദേശിച്ചു വിടവേ, ആ സ്ത്രീയുടെ ദൈന്യത എന്റെ ഉള്ളു പൊള്ളിക്കുന്ന വേദനയായിത്തീര്‍ന്നു.... ''എന്റെ ആടുകള്‍ അവര്‍ക്കു ഭക്ഷണമായി തീരാതിരിക്കാന്‍ ഞാന്‍ അവയെ അവരുടെ വായില്‍നിന്നും രക്ഷിക്കും'' (എസക്കി. 34: 10).

അലഞ്ഞുതിരിയുന്ന ആത്മാക്കളും അവരെ ഒതുക്കാനുള്ള തത്രപ്പാടുക ളുമാണിന്ന് ചില ധ്യാന -കൗണ്‍സെലിങ് ഗ്രൂപ്പുകളുടെ മുഖ്യ അജണ്ട. സത്യസഭയില്‍നിന്ന് വ്യതിചലിച്ചുപോയ ചില വിഘടന ഗ്രൂപ്പുകളും ഇന്ന് ഇതുപറഞ്ഞാണ് പാവങ്ങളെ പേടിപ്പിച്ചു കൂടെനിര്‍ത്തുന്നത്. പരിഹാരപ്രക്രിയകളുടെ കൂട്ടത്തില്‍ പരിശുദ്ധ കുര്‍ബാനകൂടി ഉള്‍പ്പെടുത്തുന്നത് അവരുടെ വിശ്വാസ്യതയുടെ വിലകൂട്ടുക എന്ന കപടചിന്തയോടെയാണ്. സ്വര്‍ഗ്ഗം, നരകം, ശുദ്ധീകരണസ്ഥലം എന്നിവിടങ്ങളിലല്ലാതെ മരിച്ച ഒരുവന്റെ ആത്മാവിന് മറ്റെങ്ങും പോകാനാവില്ലെന്ന് സത്യവിശ്വാസം നമ്മെ പഠിപ്പിക്കുന്നു. രണ്ടു പ്രാവശ്യം ധ്യാനം കൂടിയാല്‍ സാക്ഷ്യത്തൊഴിലാളികളും, മൂന്നുകൂടിയാല്‍ കൗണ്‍സെലറും, നാലുകൂടിയാല്‍ പ്രഭാഷകനും, അഞ്ചുകൂടിയാല്‍ അഭിഷേകത്തിന്റെയെല്ലാം മൊത്തക്കച്ചവടക്കാരനുമാക്കുന്ന ധ്യാനടീമുകളെയും മന്ദിരങ്ങളെയും സൂക്ഷിക്കുക. കൗണ്‍സെലിങിന്റെ ബാലപാഠങ്ങള്‍പോലുമറിയാത്ത കൗണ്‍സെലിങുകാരെയും. സ്വയംപ്രഖ്യാപിത 'ബ്രദറു'മാരെയും അകറ്റിനിര്‍ത്തിയില്ലെങ്കില്‍, മാനസികസംഘര്‍ഷവും ധനനഷ്ടവും മാനഹാനിയും ഉറപ്പ്.

''വഞ്ചിക്കപ്പെടാതിരിക്കാനും ഭോഷത്തംമൂലം നിന്ദിക്കപ്പെടാതിരിക്കാനും ശ്രദ്ധിക്കുക'' (പ്രഭാ. 13:8)

പ്രതികരണം                  ജോസഫ് പുലിക്കുന്നേല്‍

ലേഖകന്‍ പറയുന്നു കുര്‍ബാനപണം കുര്‍ബാനയ്ക്കുള്ള ധര്‍മ്മമാണെന്ന്. ധര്‍മ്മമാണെങ്കില്‍ ഒരു വ്യക്തി സ്വമേധയാ നല്‍കുന്നതാണ്. എന്നാല്‍ ഇന്ന് പല പള്ളികളുടെയും ''തിരുമുറ്റത്ത്'' ഹോട്ടലിലെ വിലവിവരപ്പട്ടിക പോലെ കുര്‍ബാനയ്ക്കും അന്നീദായ്ക്കും ഒപ്പീസിനും എല്ലാം വിവിധ നിര ക്കുകള്‍ പ്രസിദ്ധീകരിച്ചിരിക്കുന്നതുകാണാം. മസാല ദോശ, നെയ്‌റോസ്റ്റ്, സാധാ ദോശ മുതലായ ദോശകള്‍ക്ക് വ്യത്യസ്ത വിലയെന്നപോലെ കുര്‍ബാനയ്ക്കും വില നിര്‍ണ്ണയിച്ചരിക്കുന്നു.