Translate

Friday, January 19, 2018

ഡൽഹി ലത്തീൻ അതിരൂപതയും ഫരിദാബാദ്‌ സീറോ-മലബാർ രൂപതയും


ചാക്കോ കളരിക്കൽ

ഡൽഹിയിൽ സീറോ-മലബാർ രൂപത ഫരിദാബാദ്‌ ആസ്ഥാനമാക്കി മാർച്ച് 06, 2012-ൽ സ്ഥാപിതമായി. അതിനുശേഷം 2014-ൽ ഡൽഹി രൂപതാധ്യക്ഷനും ഫരിദാബാദ്‌ രൂപതാധ്യക്ഷനും ചേർന്ന് ജോയിൻറ് പാസ്റ്ററൽ കത്ത് പ്രസിദ്ധീകരിക്കുകയുണ്ടായി. ആ രേഖയിൽ ഡൽഹിയിലെ ലത്തീൻ പള്ളികളിൽ തലമുറകളായി അംഗത്വമെടുത്ത് വേണ്ട അജപാലനം സ്വീകരിച്ചുകൊണ്ടിരിക്കുന്ന സീറോ-മലബാർ കുടുംബ പശ്ചാത്തലമുള്ള എല്ലാ അല്മായരും ഓട്ടോമാറ്റിക്കായി ഫരിദാബാദ്‌ സീറോ-മലബാർ രൂപതയിലെ ഇടവകകളിലെ അംഗങ്ങളാകുമെന്ന് പ്രഖ്യാപിച്ചിരുന്നു. ഡൽഹി ലത്തീൻ രൂപതയിലെ സേവനത്തിൽ തൃപ്തരും സീറോ-മലബാർ റീത്തുമായി പ്രായോഗികമായി യാതൊരു ബന്ധവും ഇല്ലാത്ത അനവധി കുടുംബങ്ങൾ മെത്രാന്മാരുടെ ഏകപക്ഷീയമായ ആ തീരുമാനത്തെയും അവർ പുറപ്പെടുവിച്ച സംയുക്ത രേഖയെയും നഖശിഖാന്തം ഏതുർക്കുകയുണ്ടായി. 'ലെയ്റ്റി4യൂണിറ്റി' എന്ന പേരിൽ ഒരു സംഘടന സ്ഥാപിച്ച് ആ സംഘടനയുടേതായി മാർപാപ്പയ്ക്ക് ഒരു നിവേദനം 2014 മെയ് മാസത്തിൽ നല്‌കുകയുണ്ടായി. ലത്തീൻ ഇടവകകളിൽ തുടരാൻ അനുവദിക്കണമെന്നും മാമോദീസ, സ്ഥൈര്യലേപനം, വിവാഹം തുടങ്ങിയ കൂദാശകൾ രണ്ട്  റീത്തുകളും സഹകരിച്ച് വിശ്വാസികൾക്ക് ബുദ്ധിമുട്ടുകൾ ഉണ്ടാക്കാതെ നിർവ്വഹിച്ചുതരണമെന്നുമാണ് നിവേദനത്തിൽ ആവശ്യപ്പെട്ടത്. ആ നിവേദനത്തിൻറെ അടിസ്ഥാനത്തിൽ 2016 ജനുവരി 28-ന് പൗരസ്ത്യ തിരുസംഘത്തലവൻ കർദിനാൾ സാൻഡ്രി ഒരു "പ്രബോധനം" രണ്ടു മെത്രാന്മാർക്കും നൽകുകയുണ്ടായി. ആ മറുപടിയും അത് എപ്രകാരമാണ് മനസ്സിലാക്കി പ്രാബല്യത്തിൽ വരുത്തേണ്ടത് എന്നതു സംബന്ധിച്ച രണ്ട് രേഖകളാണ് താഴെ കൊടുത്തിരിക്കുന്നത്. ആ "പ്രബോധനം" ഡൽഹിയ്ക്കു മാത്രമല്ല സാർവത്രിക സഭയ്ക്കും ബാധകമാണെന്ന് എല്ലാ സീറോ-മലബാറുകാരും മനസ്സിലാക്കിയിരിക്കേണ്ടതാണ്.
ഡൽഹി അതിരൂപതാതിർത്തിയിൽ വസിക്കുന്ന സീറോ-മലബാർ വിശ്വാസികളിൽ ചിലർ ലത്തീൻ പള്ളികളിൽ കൂദാശകൾ സ്വീകരിക്കുന്നതിനു അനുവാദം ചോദിച്ചുകൊണ്ട് പൗരസ്ത്യ തിരുസംഘത്തിന് നൽകിയ അപേക്ഷക്കുള്ള മറുപടിയിലെ നിബന്ധനകൾ
പരിഭാഷകൻ: ജോസഫ് കളരിക്കൽ, ഫ്‌ളോറിഡ
ഡൽഹി അതിരൂപതാതിർത്തിക്കുള്ളിൽ വസിക്കുന്ന സീറോ-മലബാർ വിശ്വാസികൾക്ക് അതിരൂപത കുറെ കൊല്ലങ്ങളായിട്ട് അജപാലന ശുശ്രൂഷകൾ ഉദാരമായി നൽകിയിരുന്നു. എന്നാൽ സീറോ-മലബാർ വിശ്വാസികൾക്കായി ഫരിദാബാദ് രൂപതാസ്ഥാപനത്തോടെ, ലത്തീൻ സഭാന്തരീക്ഷത്തിൽ ഏറെക്കാലം ജീവിച്ച കുറെ പൗരസ്ത്യസഭാ വിശ്വാസികൾക്ക് വിദ്വേഷം അനുഭവപ്പെട്ടതിൽ അതിശയപ്പെടാനില്ല. എന്നിരുന്നാലും, ഇതുമായി ബന്ധപ്പെട്ട എല്ലാവരും പരസ്പര ധാരണയോടും ബഹുമാന പൂർവ്വവും പെരുമാറിയാൽ, ഇന്നത്തെ നിയമത്തിൻറെ ചട്ടക്കൂട്ടിൽ നിന്നുകൊണ്ടുതന്നെ, ഈ സാഹചര്യത്തെ സന്തോഷത്തോടെ കൈകാര്യം ചെയ്യാൻ സാധിക്കും.
ആദ്യമേതന്നെ ചില നിയമ വാദമുഖങ്ങൾ റഫറൻസ് പോയൻറുകളായി ഓർമ്മിക്കുന്നത് ഉപകാരപ്രദമായിരിക്കും. ഒരു വ്യക്തിയുടെ റീത്ത് സ്വയം തീരുമാനിക്കാനുള്ള പൊതു അവകാശം നിലനിൽക്കുന്നില്ല; മറിച്ച്, അയാളുടെ സ്വന്തം റീത്തിനെ സാധിക്കുന്ന വിധത്തിൽ അനുധാവനം ചെയ്യാനുള്ള കടമയുമുണ്ട് (cfr. CCEO can. 40 3 and can. 35). എന്നിരുന്നാലും, മറ്റൊരു സ്വയംഭരണാധികാര സഭയിലേയ്ക്ക് മാറാൻ ആവശ്യപ്പെടുന്ന സാഹചര്യങ്ങൾ ഉണ്ടാകാം. ആ സാഹചര്യത്തിൽ ബന്ധപ്പെട്ട മെത്രാന്മാർ, മാറ്റം ആരെങ്കിലും ആഗ്രഹിക്കുന്നെങ്കിൽ, അത് സുഗമമാക്കാൻ തയ്യാറാണ്. അപ്പോസ്തലിക സിംഹാസനത്തിൻറെ സമ്മതം ഒരുപക്ഷെ കരുതാം (cfr CCEO can. 32 2). CCEO can. 37 - അത്തരത്തിലുള്ള മാറ്റങ്ങൾ രജിസ്റ്റർ ചെയ്യുമ്പോൾ പ്രത്യേകം ശ്രദ്ധിക്കണം.

മുകളിൽ പരാമർശിച്ചത് ഓർമിക്കുമ്പോൾ അതിൻറെ വെളിച്ചത്തിൽ ചില സീറോ-മലബാർ വിശ്വാസികൾക്ക് അവരുടെതന്നെ സ്വയംഭരണാധികാര സഭയിൽ പങ്കെടുക്കുന്നതിൽ ബുദ്ധിമുട്ട് അനുഭവപ്പെടുന്നുണ്ടെങ്കിൽ, ലത്തീൻ സഭയെ ഉപേക്ഷിക്കാൻ ആഗ്രഹമില്ലെങ്കിൽ, അവർക്ക് സ്വയംഭരണാധികാരമുള്ള ഏതു സഭയിലെയും ആരാധനക്രമങ്ങളിൽ പങ്കെടുക്കാൻ അവകാശമുണ്ട് (cfr. CCEO can. 403 1, CIC can. 923). ഒരു സ്വയംഭരണാധികാരമുള്ള സഭയിൽനിന്നും കൂദാശകൾ സ്വീകരിക്കുന്ന പതിവുകൊണ്ട് ആ സഭയിലെ അംഗമാകുമെന്ന് സൂചിപ്പിക്കുന്നില്ലായെന്ന് ലത്തീൻ സഭയുടെ കാനോൻ നിയമത്തിൽ ഊന്നിപ്പറയുന്നുണ്ട് (CIC can. 112 2).
തത്ഫലമായി, ഒരു സീറോ-മലബാർ വിശ്വാസി നിയമത്തിൻറെ ബലത്താൽത്തന്നെ അയാളുടെ വീട് സ്ഥിതിചെയ്യുന്ന സീറോ-മലബാർ ഇടവകയിലെ അംഗമായിരുന്നാലും (CCEO can. 112 2), ലത്തീൻ ഇടവകയിലെ ജീവിതത്തിലും പ്രവർത്തനങ്ങളിലും പൂർണ്ണമായി ഉൾപ്പെടാം. അത്തരത്തിലുള്ള വിശ്വാസികളെ സൂക്ഷ്‌മമായി കൈകാര്യം ചെയ്യേണ്ട അവസ്ഥ മനസ്സിലാക്കി ഇടവക വികാരിമാർ ആ വിശ്വാസികളുടെ വിശ്വാസ ജീവിതത്തെ ശാന്തവും സുന്ദരവുമാക്കാനുള്ള പ്രവർത്തനം സുഗമമാക്കേണ്ടാതാണ്.
പ്രായോഗികമായി, ഒരു വിശ്വാസിയുടെ നിയമപ്രകാരമുള്ള വൈദികന് പകരക്കാരനായി ലത്തീൻ വൈദികൻ, നിലവിലുള്ള നിയമമനുസരിച്ച്, ജ്ഞാനസ്നാനം, സ്ഥൈര്യലേപനം, വിവാഹം എന്നീ കൂദാശകൾ നിർവഹിച്ചുകൊടുക്കേണ്ടതാണ്. ജ്ഞാനസ്നാനത്തിന് ലത്തീൻ വൈദികൻ പൗരസ്ത്യ സഭയിലെ വൈദികനോട് (cfr. CCEO can. 677 1, 678 and 683) അഭ്യർത്ഥിക്കേണ്ടതാണ്. ലത്തീൻ ഇടവകയിലെ ജ്ഞാനസ്നാനത്തിൻറെ രജിസ്റ്ററിൽ, സീറോ-മലബാർ സഭയിലെ അംഗമാണെന്ന് വ്യക്തമാക്കി ചേർക്കേണ്ടതാണ്. കൂടാതെ, ലത്തീൻ വികാരി പൗരസ്ത്യ സഭയിലെ വികാരിക്ക് അറിയിപ്പിനായി മാമ്മോദീസാസർട്ടിഫിക്കറ്റ് അയയ്ക്കണം. സ്ഥൈര്യലേപനത്തിൻറെ കാര്യത്തിലും അതേ പ്രക്രിയ ആയിരിക്കണം. വിവാഹ കാര്യത്തിലാണെങ്കിൽ, പാർട്ടിയിലെ ഒരു കക്ഷി ലത്തീൻ സഭാംഗമാണെങ്കിൽ ലത്തീൻ വികാരിയായിരിക്കും അർഹതപ്പെട്ടയാൾ. പകരം, വിവാഹം രണ്ട് പൗരസ്ത്യ സഭാംഗങ്ങൾ തമ്മിലാണെങ്കിൽ, ലത്തീൻ വികാരി പൗരസ്ത്യ സഭയിലെ വികാരിയോട് അനുമതിപത്രം ആവശ്യപ്പെടണം. ഒരു പാർട്ടി അകത്തോലിക്കാ ക്രിസ്തീയ വിഭാഗത്തിൽ പെട്ടതോ അഥവാ അന്യമതത്തിൽ പെട്ടതോ ആയിരുന്നാൽ പൗരസ്ത്യ സഭയിലെ ഹയരാർക്കിക്കാണ് അർഹതയുള്ളത്. ഈ സാഹചര്യങ്ങളിലെല്ലാം, ലത്തീൻ സഭയിലെ വികാരി പൗരസ്ത്യ സഭയിലെ വികാരിക്ക് ഒരു അറിയിപ്പ് അയയ്‌ക്കേണ്ടതാണ്. ഇത്തരത്തിലുള്ള സഭയുടെ അകത്തുള്ള സഹകരണം, വിശ്വാസികളുടെ ആധ്യാത്മിക നന്മ അന്തിമ ലക്ഷ്യമായി കണ്ട്, ബഹുമാനത്തോടും, പ്രായോഗികതയോടും, കൃത്യതയോടെയും സംഭവിക്കണം.
ഡൽഹിയിലെ ഒരു ലത്തീൻ ഇടവകയിലെ സീറോ-മലബാർ വിശ്വാസി മേല്പറഞ്ഞ കൂദാശകൾ കേരളത്തിൽ നടത്താൻ ആവശ്യപ്പെടുമ്പോൾ വൈദികർ സഹകരണ മനോഭാവത്തോടെ ചെയ്തുകൊടുക്കണമെന്ന് സീറോ-മലബാർ സഭയിലെ മെത്രാൻ സിനഡിലെ അംഗങ്ങൾ അവരുടെ വൈദികരോട് ആവശ്യപ്പെടണം. രജിസ്റ്ററിനെ അടിസ്ഥാനമാക്കിയുള്ള ആധാരരേഖ (ഉദാ: ഫ്രീ സ്റ്റേറ്റ് സർട്ടിഫിക്കറ്റ്), മാമ്മോദീസ സ്വീകരിച്ച സ്ഥലത്തെ സീറോ-മലബാർ വികാരിയുടെയോ ലത്തീൻ വികാരിയുടെയോ, സ്വീകാര്യമായിരിക്കും. മറ്റേതെങ്കിലും സാക്ഷ്യപ്പെടുത്തലുകൾ ആവശ്യമെങ്കിൽ (ഉദാ: ഒരാൾ നിലവിൽ സഭാജീവിതം നയിക്കുന്നുണ്ടോ) അത്, വ്യക്തി സാധാരണ പോകുന്ന ലത്തീൻ ഇടവകയിലെ വികാരി നല്കേണ്ടതാണ്.
ചുരുക്കത്തിൽ, സീറോ-മലബാർ സംജ്ഞയുള്ള വിശ്വാസികൾ ഫരീദാബാദ് രൂപതാതിർത്തിക്കുള്ളിൽ വസിക്കുമ്പോൾ, ലത്തീൻ ഇടവകയിൽ ഇടയ്ക്കിടെ പോയാലും, രൂപതാമെത്രാൻറെ അധീനതയിലായിരിക്കും. എന്നിരുന്നാലും, അവരുടെ സാഹചര്യം മനസ്സിലാക്കാവുന്നതാണെന്ന് ഉറപ്പുവരുത്തുന്നതോടൊപ്പം അവരുടെ പ്രചോദനത്തെ ബഹുമാനിക്കുകയും ചെയ്യുന്നു. ലത്തീൻ ഇടവകയിലെ പൂർണ്ണ ഇടപെടലുകളിൽനിന്ന് ഒഴിവാക്കപ്പെട്ടവരായിട്ടോ സീറോ-മലബാർ ഇടവകയിൽ താഴ്ത്തപ്പെട്ടവരായിട്ടോ ഇപ്പറഞ്ഞ അംഗങ്ങൾക്ക് തൊന്നാതിരിക്കാൻ എല്ലാവരും ശ്രദ്ധിക്കേണ്ടതാണ്. കത്തോലിക്കാ സഭയുടെ മാനദണ്ഡങ്ങൾ വിശ്വാസികളുടെ പക്ഷത്തുനിന്നും സന്തോഷപൂർവ്വം സ്വീകരിക്കാനും കൂടാതെ സഭാ ശുശ്രൂഷകർ സ്വയംഭരണാധികാരമുള്ള ഇന്ത്യയിലെ വിവിധ സഭകളിലെ വിശ്വാസികളുടെ ഉചിതമായ സഹപ്രവർത്തനത്തെ വളർത്തുവാനും അഭ്യർത്ഥിക്കുന്നു.

വിശ്വാസികളുടെ ആവശ്യങ്ങളെ മനസ്സിലാക്കികൊണ്ടും നിലവിലുള്ള കാനോനിക മാനദണ്ഡങ്ങളെ പാലിച്ചുകൊണ്ടും ലത്തീൻ സഭയിലെയും സീറോ-മലബാർ സഭയിലെയും വികാരിമാരുടെ വൈദിക തീക്ഷ്ണതയിലുള്ള ആത്മവിശ്വാസത്തിലും ഈ തിരുസംഘം പൊതു സ്വഭാവമുള്ള ഒരു പ്രത്യേക 'ഇൻഡൽട്ട്' (indult) നൽകാനുള്ള ആവശ്യമോ അവസരമോ ആയി ഈ സാഹചര്യത്തെ പരിഗണിക്കുന്നില്ല.
വത്തിക്കാൻ സിറ്റി, 28 ജനുവരി 2016
ഒപ്പ്
ലയണാർഡോ  കാർദ്ദിനാൾ സാൻഡ്രി
പ്രീഫെക്ട്
ഒപ്പ്
സിറിൽ വസിൽ, എസ്‌. ജെ.
മെത്രാപ്പോലീത്ത സെക്രട്ടറി

സീറോ- മലബാർ വാദവിഷയത്തിന് റോമിൽനിന്നുലഭിച്ച “പ്രബോധന” ത്തെ (Instruction) മനസ്സിലാക്കേണ്ടത്
പരിഭാഷകൻ: ചാക്കോ കളരിക്കൽ

മെയ് 24, 2014-ൽ പരിശുദ്ധ പിതാവിന് "ക്രിസ്തു വിഭജിക്കപ്പെട്ടതോ" എന്ന ശീർഷകത്തിൽ നമ്മൾ സമർപ്പിച്ച പരാതിയ്ക്ക് വ്യക്തവും, നിശ്ചിതവും, സമഗ്രവുമായ ഒരു മറുപടി റോമിൽനിന്നുണ്ടായി എന്നുള്ള വിവരം ഇപ്പോൾ ആഗോളവ്യാപകമായി അറിയപ്പെട്ടിട്ടുണ്ട്. പൗരസ്ത്യ തിരുസംഘത്തലവൻ ലിയനാർഡോ കർദിനാൾ സാൻഡ്രി ജനുവരി 28, 2016-ൽ ഒപ്പിട്ട ആ മറുപടി, ഔപചാരിക രൂപത്തിലുള്ള "പ്രബോധനം" വ്യാപകമായി പ്രചരി പ്പിക്കപ്പെട്ടിട്ടുണ്ട്.

അത് 1993-ൽ കല്ല്യാൺ (ബോംബെ) രൂപതയ്ക്ക് നൽകിയ "ഇൻഡൾറ്റ് (Indult) അഥവാ സഭാനിയമങ്ങളിൽ നിന്നുള്ള ഒഴിവാക്കൽ അല്ല എന്നുള്ളകാര്യം ശ്രദ്ധിക്കേണ്ടതാണ്, പരാതിയിൽ ആവശ്യപ്പെട്ടിരിക്കുന്നത് നിലവിലുള്ള സഭാനിയമ പരിധിയിൽ പെടുന്നതാണെന്ന് ആ "പ്രബോധനം" വ്യക്തമായി പ്രസ്താവിക്കുന്നു. ആ വ്യക്തമായ പ്രസ്താവനയും - കൂടാതെ ഹർജി നൽകാനിടയായ സാഹചര്യവും - സാർവ്വലൗകികമായി ഉപയോഗമുള്ളതുമാണ്. വ്യക്തത, ശക്തി, "പ്രബോധന" ത്തിൻറെ ദൃഢമായ സ്വഭാവമെല്ലാം വെച്ചുനോക്കുമ്പോൾ അതിൽ ആവിഷ്‌ക്കരിച്ചിരിക്കുന്ന തത്ത്വം സാർവത്രികമാണെന്ന് വ്യക്തമാണ്.

അങ്ങനെ ഇവിടെയും (ഡൽഹിയിലും) സാർവ്വത്രികസഭയിലും, ഡൽഹിയിൽ സംഭവിച്ചതുപോലുള്ള സാഹചര്യങ്ങളിൽ, റീത്തിനെ തെരഞ്ഞെടുക്കുന്ന പ്രശ്നത്തിന് എന്നന്നേയ്ക്കുമായി തീർപ്പുണ്ടായി.

സീറോ-മലബാർ കുടുംബപശ്ചാത്തലമുള്ള വിശ്വാസികളെ എപ്രകാരം ബഹുമാനിക്കണമെന്നും സഹായിക്കണമെന്നും നിർബന്ധങ്ങളൊന്നുമില്ലാതെ എല്ലാ കൂദാശകളും ലത്തീൻ സഭയിൽനിന്നോ സീറോ-മലബാർ സഭയിൽനിന്നോ ലഭിക്കുമെന്നും ആ "പ്രബോധനം" വ്യക്തമാക്കിയിട്ടുണ്ട്. അതിൻറെ പശ്ചാത്തലത്തിൽ, ലത്തീൻ/സീറോ-മലബാർ അജപാലകർ "സന്തോഷകരമായ സഹകരണത്തിലൂടെ" അത് സംഭവിക്കുന്നത് ഉറപ്പാക്കണമെന്നും ആ രേഖ പ്രത്യേകം ഊന്നിപ്പറയുന്നുണ്ട്.

ആ "പ്രബോധനം" ഇന്ത്യയിൽ കിട്ടി മൂന്നുമാസം കഴിഞ്ഞപ്പോൾ നമ്മുടെ ഒരു പ്രതിനിധി കർദിനാൾ സാൻഡ്രിയെ ഔപചാരികമായി കാണുകയുണ്ടായി. തിരുസംഘത്തലവൻ രണ്ടു കാര്യങ്ങൾ വ്യക്തമാക്കി: 1) "സാധ്യമാകുന്നിടത്തോളം" ("പ്രബോധന" ത്തിൽ കാണുന്ന പദപ്രയോഗവും അദ്ദേഹം ആവർത്തിച്ചതുമായ) സീറോ-മലബാർ കുടുംബപശ്ചാത്തലമുള്ളവർ കഴിവതും സീറോ-മലബാർ സഭയെ സ്വീകരിക്കാൻ പ്രോത്സാഹിപ്പിക്കണം. 2) സഭ എന്നും വൈവിധ്യത്തെ സ്‌നേഹിക്കുന്നു; എങ്കിലും ആ വൈവിധ്യം സഭയിൽ വിഭജന കാരണമാകാൻ ഉദ്ദേശിച്ചിട്ടില്ല.

2016-റിലെ പന്തക്കുസ്ത ഞായറാഴ്ച പരാതിക്കാർ ഒരു പൊതുയോഗം വിളിച്ചുകൂട്ടുകയുണ്ടായി. അതിൽ എല്ലാ കാര്യങ്ങളും വിശദമായി വിവരിക്കുകയുണ്ടായി. ആ സമ്മേളനത്തിൽ സംബന്ധിക്കാൻ സാധിക്കാത്തവർക്കുവേണ്ടി - ഈ പ്രശനത്തിന് പ്രസക്തിയുള്ള ലോകത്തിൽ എവിടെയുള്ളവരായാലും - ഇപ്പോൾ ഞങ്ങൾ നിങ്ങളുടെ പരിശോധനയ്ക്കായി ഒരിക്കൽക്കൂടി യഥാർത്ഥ "പ്രബോധനം" അവതരിപ്പിക്കുന്നു. എന്നാൽ ഇപ്രാവശ്യം ഖണ്ഡികകൾ തിരിച്ച് അത് എന്താണ് അർത്ഥമാക്കുന്നത് എന്നതിനെ സംബന്ധിക്കുന്ന വിശദീകരണങ്ങളും അഭിപ്രായങ്ങളും അടങ്ങിയിട്ടുണ്ട്.

"പ്രബോധന" ത്തിൻറെ ആത്മാവറിഞ്ഞ് നിങ്ങൾ പഠിച്ചതിൻപ്രകാരമുള്ള അഭിപ്രായങ്ങളെ ഞങ്ങൾ പ്രതീക്ഷയോടെ കാത്തിരിക്കുകയാണ്. നിങ്ങളുടെ അന്വേഷണങ്ങൾക്ക് ഞങ്ങൾ ഉത്തരം തരാൻ പരിശ്രമിക്കുന്നതും ആവശ്യമുള്ളിടത്ത് വ്യക്തത നൽകുന്നതുമാണ്. തിരുസംഘാധ്യക്ഷനെ കാണുകയും "പ്രബോധന" ത്തെ വിശദമായി പഠിക്കുകയും ചെയ്ത ഞങ്ങൾക്ക് അതിൻറെ അർത്ഥവും ഉദ്ദേശവും വ്യക്തമാണ്; ആവശ്യമെങ്കിൽ "പ്രബോധന" ത്തെ തെറ്റിദ്ധരിപ്പിക്കുന്ന രീതിയിലുള്ള വ്യാഖ്യാനമുണ്ടായാൽ കൂടുതൽ വിശദീകരണത്തിനായി തിരുസംഘത്തെ സമീപിക്കുന്നതിൽ ഞങ്ങൾ സന്തുഷ്ടരുമാണ്.

ലെയ്റ്റി 4 യൂണിറ്റി ഏകോപനസമിതി
ന്യൂ ഡൽഹി

http://www.malayalamdailynews.com/?p=366999

Thursday, January 18, 2018

നല്ല നിലപാടുകൾക്ക് സ്വാഗതം!

കത്തോലിക്കാസഭയിലെ പുതിയ തീരുമാനങ്ങൾക്ക് സ്വാഗതം.

ഇനി വികാരിമാരെ ഒതുക്കണം.

കത്തോലിക്കാ സഭയിൽ ചില മാറ്റങ്ങൾ വരുന്നു. നല്ല നിലപാടുകൾക്ക് സ്വാഗതം.

കഴിഞ്ഞ 'ഉള്ളതു പറഞ്ഞാൽ' എന്ന കോളത്തിൽ പ്രധാനമായും ഉന്നയിച്ചത് അൾത്താരയിലെ വൈദീകരുടെ മോശമായ പെരുമാറ്റമായിരുന്നു. വിശ്വാസികളെ ശപിക്കാനും ചീത്തവിളിക്കാനും പണപ്പിരിവ്‌ നടത്താനും ആത്മീയമല്ലാത്ത പെരുമാറ്റങ്ങൾക്കും വൈദീകർ അൾത്താര ഉപയോഗിക്കുന്നതിനെ തടയണമെന്ന് ശക്തമായി പറഞ്ഞിരുന്നു. ഇപ്പോഴിതാ മാനന്തവാടി രൂപതയിൽ നിന്നും ആശ്വാസകരമായ തീരുമാനങ്ങൾ.

രൂപത സ്വീകരിച്ച നല്ല തീരുമാനങ്ങൾ ചുരുക്കി പറയാം.

പള്ളിമുറിയുടെ ഓഫീസ് ഇടങ്ങളിൽ സി.സി. ടിവി കാമറകൾ സ്ഥാപിക്കുക. പള്ളിമേടകളിലെ സന്ദർശകർ ആരൊക്കെയെന്ന് മനസിലാക്കാനും പള്ളിമേടകളുടെ പ്രവർത്തനം സുതാര്യമാക്കാനും ആക്ഷേപങ്ങൾ ഒഴിവാക്കാനും വേണ്ടീയാണിത്.

ഇടവകകളിൽ അഞ്ചുവർഷത്തേക്ക് നിർമ്മാണ പ്രവൃത്തികൾ നിർത്തിവയ്ക്കാനും തീരുമാനമായി.

പിരിവിന്റെയോ സംഭാവനയുടേയോ പേരിൽ ഒരു ശിക്ഷാനടപടിയും പാടില്ല. നിർബന്ധിത പിരിവ്‌ കർശനമായി നിരോധിച്ചു.

അൾത്താരബാലികമാർ അനിവാര്യമല്ല. ഉണ്ടെങ്കിൽ അവർക്ക് വസ്ത്രം മാറുന്നതിന് പ്രത്യേക സംവിധാനങ്ങൾ നിർബന്ധമായും ഏർപ്പെടുത്തിയിരിക്കണം.

പള്ളിമുറിയിൽ സ്ത്രീകൾക്ക് കർശന നിയന്ത്രണം ഉണ്ടായിരിക്കും.

ഇടവകയിലെ വികാരിക്കും അസിസ്റ്റന്റ് വികാരിമാർക്കും മാത്രമേ പള്ളിമുറിയിൽ രാത്രി തങ്ങാൻ അനുവാദമുള്ളു.

കൗൺസലിങ് പോലുള്ള കാര്യങ്ങൾ തുറന്ന സ്ഥലങ്ങളിൽ മാത്രമേ നടത്താൻ പാടുള്ളു.

വിശുദ്ധ കുർബാന പ്രസംഗമധ്യേ വൈദികർ ആരെയും തേജോവധം ചെയ്യാൻ പാടില്ല.

പിരിവ്, സംഭാവന തുടങ്ങിയവ കുടിശികയായതിന്റെ പേരിൽ വിവാഹം, മാമോദീസ, മരണാനന്തര കർമങ്ങൾ തുടങ്ങിയവ നിഷേധിക്കാൻ പാടില്ല.

ബിഷപ് മാർ ജോസ് പൊരുന്നേടം തന്നെയാണ് ഈ മുൻകരുതൽ നിർദേശങ്ങൾ മുന്നോട്ടുവച്ചത്.

ഈ തീരുമാനങ്ങൾ നടപ്പാക്കാൻ വികാരിമാരെ ജനം നിർബന്ധിക്കണം. വികാരിമാർ ഫലത്തിൽ മാർപ്പാപ്പക്കും മേലേയാണ്‌ എന്ന അഹങ്കാരത്തിലാണ്‌. അഹങ്കാരത്തിനും ആർത്തിക്കും പണത്തിനും പിരിവിനും   കൈയ്യും കാലും വെച്ച രൂപങ്ങളാണ്‌ പല ഇടവക വികാരിമാരും. പിരിവും ആർഭാഢവും ചിലവും കുറക്കണമെന്ന കർദ്ദിനാളിന്റേയും മാർപ്പാപ്പയുടേയും നിർദ്ദേശം പള്ളിയിലെ  അസ്ഥിക്കുഴിയിൽ തള്ളിയ പെരുംതച്ചന്മാരാണ്‌ പലരും. ഇപ്പോൾ മാനന്തവാടി രൂപതാ ബിഷപ്പ് പ്രഖ്യാപിച്ച നയങ്ങൾ വികാരിമാരെക്കൊണ്ട് നടപ്പിലാക്കാൻ വിശ്വാസികൾ വേണ്ടിവന്നാൽ ബലപ്രയോഗം നടത്തിയാലും അധികമാകില്ല. അത്ര വഷളാണ്‌ പള്ളിമേടയിൽ ജീവിക്കുന്ന ചില രൂപങ്ങൾ ഉണ്ടാക്കുന്ന ആഘാതങ്ങൾ. ആത്മ്മിയതയും, സ്നേഹവും സൗമ്യതയും തൊട്ടുതീണ്ടാത്ത കുറെ ആളുകൾ ഇക്കൂട്ടത്തിൽ ഉണ്ട്.

കുർബാനമദ്ധ്യേ അൾത്താരയിൽ നിന്ന്  ആത്മീയമല്ലാത്ത കാര്യങ്ങൾ പറയുന്ന വൈദീകനെ വിദേശത്ത് ആ സമയത്തു തന്നെ എഴുനേറ്റ് നിന്ന് വിശ്വാസികൾ ചോദ്യം ചെയ്യും. എന്നിട്ടേ കുർബാനയുടെ ബാക്കി ചൊല്ലിക്കൂ. കേരളത്തിലെ വിശ്വാസികൾക്ക് ആ ധൈര്യം വരുവോളം അവർ കഴുത്തു നീട്ടി അറവുമാടുകളെപ്പോലെ എന്തുപറഞ്ഞാലും കേൾക്കാൻ പള്ളിയിൽ കഴുത്തും നീട്ടിയിരിക്കും. വിശ്വാസികൾ കടമ നിറവേറ്റണം, ഉത്തരവാദിത്വബോധം കാട്ടണം. വിശ്വാസ സംരക്ഷണത്തിന്‌ വിശ്വാസികൾക്ക്‌ ഉത്തരവാദിത്വമുണ്ട്. അവർ മൗനികളാകരുത്.

മാനന്തവാടി രൂപതാ മെത്രാന്റെ നല്ല നിർദ്ദേശങ്ങൾ മറ്റ് രൂപതകളിലും നടപ്പിലാക്കാൻ അവിടുത്തെ വിശ്വാസികൾ സ്വാധീനം ചെലുത്തണം. അവിടെയും ഒരു വൈദീകൻ ബലാൽസംഗത്തിനും കൊലപാതകത്തിനുമൊ ക്കെ ജയിലിൽ ആകും വരെ കാത്തിരിക്കേണ്ട കാര്യമില്ല.

ബഹുമാനപ്പെട്ട കർദിനാളും മാനന്തവാടി രൂപതാ മെത്രാനും അറിയാൻ ഒരു നിർദ്ദേശം കൂടി വയ്ക്കട്ടെ.

ഇടവക ഒരു കുടുംബമാണ്‌. അവിടെ ഞങ്ങൾ വിശ്വാസികൾ കെട്ടിപ്പൊക്കിയ സ്ഥാപനങ്ങൾ, കല്യാണമണ്ഡപം, ഹാളുകൾ, പള്ളി എന്നിവയുണ്ട്. ആ ഇടവകയിലെ  വിശ്വാസികൾ അവരുടെ ആവശ്യത്തിന്‌ അവരുടെ പണം കൊണ്ട് ഉണ്ടാക്കിയതാണ്. ചില്ലിക്കാശ്പോലും ഒരു ബിഷപ്പിന്റേയും വൈദീകന്റെയും കൈയ്യിൽ നിന്നും ഉപയോഗിച്ചിട്ടില്ല. ആ സ്ഥാപനങ്ങൾ സൗജന്യമായി ഉപയോഗിക്കാൻ ഞങ്ങൾക്ക് അനുവാദം തരണം. ഞങ്ങൾ ഉണ്ടാക്കിയ ഞങ്ങളുടെ കുടുംബത്തിലെ ഈ സ്ഥാപനങ്ങൾ ഉപയോഗിക്കുമ്പോൾ 5000 മുതൽ 20000 രൂപവരെ വാടകയെടുക്കുന്നത് അധമത്തമാണ്‌, നെറികേടാണ്‌. പണം..പണം…എന്ന ദുർചിന്തയാണിതിന്‌ പിന്നിൽ.

ഇത്തരത്തിൽ എരന്നും തുരന്നും കച്ചവടം നടത്തരുത്.
മാമോദീസക്ക്, മരിച്ചടക്കിന്‌, വിവാഹത്തിന്‌ ഞങ്ങൾ പണിത പള്ളി ഉപയോഗിക്കാൻ പോലും വാടക, ക്യാമറക്ക് വാടക, മൈക്കിനും വീഡിയോക്കും കപ്യാർക്കും ഒക്കെ വാടക.

ഇടവകവികാരിമാർ വിവാഹത്തിന്‌ നടത്തുന്ന അടിവേര്‌ ചെത്തി ഭീഷണിപ്പെടുത്തിയുള്ള പിരിവ്‌ അവസാനിപ്പിക്കണം. ബാങ്ക്ലോൺ എടുത്ത് വിവാഹം നടത്തുന്ന നിർദ്ധനരുടെ കയ്യിൽ നിന്നുപോലും ഭീഷണിപ്പെടുത്തിയും അരിശം കാട്ടിയും നെറ്റി ചുളിച്ചും പതിനായിരങ്ങൾ വാങ്ങി കീശയിൽ തള്ളുന്ന വികാരിമാർ ഇടിവെട്ടി ചാകാതെ ദൈവം രക്ഷിക്കട്ടെ.

ഞാനീ പറയുന്നത് ദൈവദോഷവും ക്രിസ്തുവിശ്വാസ വിരുദ്ധവും എങ്കിൽ പറഞ്ഞു കുമ്പസാരിക്കാം. ഒരു വിശ്വാസിയുടെ വിലാപമായി ഈ വരികളെ  കാണണം. സഭയിലെ നല്ല വിശ്വാസികളും വൈദീകരും  ബിഷപ്പുമാരും എന്നെ അനുകൂലിക്കും എന്ന് 100 വട്ടം ഉറപ്പ്.

മാനന്തവാടി രൂപത ഇപ്പോൾ ഇറക്കിയ നിർദ്ദേശങ്ങൾ തുടക്കം മാത്രമേ ആയുള്ളു ബഹുമാനപ്പെട്ട പിതാവേ. പള്ളികളിൽ വിശ്വാസികൾ ആധിപത്യം സ്ഥാപിക്കണം. പൗരോഹിത്യം ആത്മീയതക്കാണ്‌. അവർ അവിടെ ഇരിക്കട്ടെ. പള്ളി ഭരണവും സമ്പത്തും ഒക്കെ വിശ്വാസികൾക്ക് വിട്ട് തരിക.

എഴുതിയത്:
വിൻസ് മാത്യു

(ഫേസ്ബുക്ക്)

സത്യജ്വാല 2018 ജനുവരി

വായിക്കുവാൻ താഴെ ക്ലിക്കുചെയ്യുക 

https://drive.google.com/file/d/1db1O1i1glc1KCYknUrrvnwJZqFpH13pH/view?usp=sharing


കര്ത്താവേ ഇനി എന്തെല്ലാം കേള്ക്കാനിരിക്കുന്നു !

പി സി റോക്കി - 9961217493  

എറണാകുളം ജില്ലയിലെ തിരുവൈരാണിക്കുളം മഹാദേവ ക്ഷേത്ര ദര്‍ശനോത്സവ സമാപന ദിവസത്തില്‍ മതസൗഹാര്‍ദ്ദ സന്ദേശവുമായി ക്രിസ്ത്യന്‍, മുസ്ലീം പുരോഹിതര്‍ എത്തിയത് വളരെ നന്നായി എന്ന് ജനങ്ങളില്‍ ചര്‍ച്ചയായിരിക്കും. ക്ഷേത്രത്തിനടുത്തുള്ള കാഞ്ഞൂര്‍ ഫൊറോന പള്ളി വികാരി, വെള്ളാരപ്പള്ളി പള്ളി വികാരി, വെള്ളാരപ്പള്ളി മസ്ജിദ് ഇമാം, കാഞ്ഞൂര്‍ തിരുന്നാളാഘോഷ കമ്മിററി കണ്‍വീനര്‍, കൈക്കാരന്മാര്‍ ഇവരൊക്കെയാണ് ഈ സന്തോഷം പങ്കുവയ്ക്കാന്‍ എത്തിയിരുന്നത്  അതിരൂപതാ മെത്രാനും കൂടി കൂട്ടത്തില്‍ കൂടിയിരുന്നെങ്കില്‍ അതി ഗംഭീരം ആയിരുന്നേനെയെന്ന് ഇതു വായിക്കാനിടയായ കത്തോലിക്കാ വിശ്വാസികള്‍ അഭിപ്രായപ്പെടുന്നതു കേട്ടു. ഉത്സവത്തിന്റെ നടത്തിപ്പ് സംബന്ധിച്ച് ഉത്സവ ഭാരവാഹികളും അതിഥികളും ചര്‍ച്ച നടത്തിയിരുന്നത്രേ.
            കര്‍ത്താവേ ഇനി എന്തെല്ലാം ഇത്തരത്തില്‍ കേള്‍ക്കാനിരിക്കുന്നു. പുരോഹിതര്‍ക്ക് പ്രസാദം കൈമാറിയതും ഉഗ്രുഗ്രനായി. കാഞ്ഞൂര്‍ തിരുനാളിന് ഉത്സവക്കാര്‍ എത്തിച്ചേരാന്‍ ക്ഷണക്കത്തും കൈമാറിയിരുന്നു. ചരിത്രപ്രസിദ്ധമായ തിരുവനന്തപുരം ശ്രീപത്മനാഭ സ്വാമിക്ഷേത്രം, ശബരിമല ക്ഷേത്രം, ഗുരുവായൂര്‍ ക്ഷേത്രം, തൃശൂര്‍ ക്ഷേത്രം, കാലടി ശൃംഗേരി മഠക്ഷേത്രം, മാണിക്യമംഗലം ശ്രീ കാര്‍ത്ത്യായനി ക്ഷേത്രം, മലയാററൂര്‍ പന്തയ്ക്കല്‍ ക്ഷേത്രം ഇവിടെയൊക്കെ പരിസര പ്രദേശങ്ങളിലെ കത്തോലിക്കാ, മുസ്ലീം പുരോഹിതരെ ക്ഷേത്ര ഭാരവാഹികള്‍ ക്ഷണിക്കുന്നതും സൗഹാര്‍ദ്ദം ഊട്ടിയുറപ്പിക്കാന്‍ സഹായകരമാകുമെന്ന് അഭിപ്രായങ്ങളുയരുന്നുണ്ട്.

            തിരുവനന്തപുരത്തെ വന്‍കുന്നിന്റെ നെറുകയില്‍ കുരിശ് സ്ഥാപിക്കാന്‍ കത്തോലിക്കാ വിശ്വാസികള്‍ കുരിശും ചുമന്ന് പോയ കൂട്ടത്തില്‍ ഹിന്ദുക്കളുടെ ഓംകാരവും, മുസ്ലീങ്ങളുടെ ചന്ദ്രക്കല അടയാളവും  സ്ഥാപിക്കുവാന്‍ അവരെക്കൂടി ക്ഷണിച്ച് കുരിശ് കുഴിച്ചിട്ട് പ്രാര്‍ത്ഥിക്കാന്‍ പോയിരുന്നെങ്കില്‍ മതസൗഹാര്‍ദ്ദം കൂടുതല്‍ ദൃഢമാകാനും ഐക്യം ഭാവിയില്‍ ഭദ്രമായി നിലനില്‍ക്കാനും കൂടുതല്‍ കൂടുതല്‍ കുരിശു പള്ളികള്‍ സ്ഥാപിക്കാനും അതുവഴി വന്‍ നേട്ടങ്ങള്‍ കൊയ്യാനും സാധിക്കുമായിരുന്നെന്ന് ചിലരെല്ലാം അഭിപ്രായപ്പെടുന്നത് കേട്ടു. അല്ലാതെന്ത് സൗഹൃദം. ഭൂമി വില്പന തട്ടിപ്പ് പോലെയുള്ള പ്രശ്‌നങ്ങളില്‍ ഹിന്ദു, മുസ്ലീം സപ്പോര്‍ട്ടും ലഭിക്കുമായിരുന്നെന്നും അവിടവിടെ ചര്‍ച്ചകളുണ്ടായിരുന്നു.

Wednesday, January 17, 2018

ഇന്ത്യൻ മെത്രാന്മാർക്കുള്ള മാർപാപ്പയുടെ കത്ത്



ചാക്കോ കളരിക്കൽ

09 ഒക്ടോബർ 2017-ൽ ഫ്രാൻസിസ് പാപ്പ സീറോ-മലബാർ സഭയുടെ അജപാലന ശുശ്രൂഷാതൃത്തി ഇന്ത്യമുഴുവനുമായി വിപുലീകരിച്ചുകൊണ്ടുള്ള ഒരു കത്ത് ഇന്ത്യയിലെ എല്ലാ മെത്രാന്മാർക്കും അയയ്ക്കുകയുണ്ടായി.

നാലാം മൂറ്റാണ്ടുമുതൽ റോമാസാമ്രാജ്യത്തിലെ മതപരവും രാഷ്ട്രീയവുമായ ഭരണാതൃത്തി, രൂപത (diocese) കളായിത്തിരിച്ച പ്രദേശങ്ങളായിരുന്നു. ലത്തീൻ സഭയിൽ അങ്ങനെ രൂപതകൾ രൂപപ്പെടുകയും റോമിലെ മാർപാപ്പ നിയോഗിക്കുന്ന മെത്രാൻ തൻറെ രൂപതാതൃത്തിക്കുള്ളിൽ ഭരണം നിർവഹിക്കുകയും ചെയ്തിരുന്നു. പൗരസ്ത്യ സഭകളുടെ കീഴ്വഴക്കം പാത്രിയാക്കാമാരുടെ കീഴിൽ മെത്രാന്മാർ രൂപതയെ ഭരിക്കുന്ന സമ്പ്രദായമാണ്. റോമൻ പാശ്ചാത്യ/പൗരസ്ത്യ സഭകളിൽ ആ പാരമ്പര്യം തുടരുന്നെങ്കിലും പൗരസ്ത്യ സഭാംഗങ്ങളുടെ പ്രവാസ ജീവിതം ആരംഭിച്ചതോടെ ഒരു രൂപതയും ഒരതൃത്തിയും ഒരു മെത്രാനുമെന്ന ആശയത്തിൽനിന്നും ആധുനിക സഭയ്ക്ക് മാറിചിന്തിക്കേണ്ടിവന്നു. ഒരു രൂപതാതൃത്തിക്കുള്ളൽത്തന്നെ പല റീത്തിലെ പല മെത്രാന്മാർക്കും തങ്ങളുടെ റീത്തിലെ വിശ്വാസികളുടെമേൽ ആദ്ധ്യാത്മിക ശുശ്രൂഷ/ ഭരണ അധികാരങ്ങളുണ്ടെന്ന് റോം തിരിച്ചറിയുകയും അതിനുള്ള വഴികൾ റോം തുറന്നുകൊടുത്തുകൊണ്ടുമിരിക്കുന്ന ഒരു സ്ഥിതിവിശേഷവുമാണ് ഇന്നുള്ളത്. അമേരിക്കയിലാണെങ്കിൽ അർമേനിയൻ, കാൽഡിയൻ, ഉക്രേനിയൻ, മാറോനൈറ്, റുത്തേനിൻ തുടങ്ങിയ പൗരസ്ത്യസഭാരൂപതകൾ ലത്തീൻ രൂപതാതൃത്തികളിൽ സ്ഥാപിച്ച് പ്രവർത്തിക്കുന്നുണ്ടെന്ന് നമുക്കറിയാം. കേരളത്തിലെ മാർതോമാ നസ്രാണി സഭ റോമാസാമ്രാജ്യാതൃത്തിയിലുണ്ടായിരുന്ന പാശ്ചാത്യ/പൗരസ്ത്യ സഭകളിൽ ഉൾപ്പെട്ട ഒരു സഭ അല്ലാതിരുന്നതിനാൽ നമുക്ക് മെത്രാന്മാരെ ബാഗ്ദാദിൽനിന്നും മറ്റുമാണ് ലഭിച്ചിരുന്നത്. നസ്രാണികൾ റോമാസഭയുടെ ഭാഗമായതോടെ മെത്രാനും രൂപതയുമെല്ലാമായി. കൂടാതെ ഒരു കാലത്തും റോമൻ പൗരസ്ത്യസഭകളിൽ ഉൾപ്പെടാത്ത മാർതോമാ ക്രിസ്ത്യാനികളെ -സീറോ-മലബാർ കത്തോലിക്കാ സഭയെ- പൗരസ്ത്യ സഭകളുടെ ഭാഗമാക്കുകയും ചെയ്തു. ഇന്ന് സീറോ-മലബാർ സഭയ്ക്ക് ഇന്ത്യയ്ക്ക് വെളിയിൽ ലത്തീൻ രൂപതാവരമ്പുകളെ ഭേദിച്ച് അമേരിക്ക, കാനഡ, യു കെ, ഓസ്ട്രേലിയ തുടങ്ങിയ രാജ്യങ്ങളിൽ രൂപതകൾ ഉണ്ട്. ഏറെക്കാലമായി കേരളത്തിൽ സീറോ-മലങ്കര, സീറോ-മലബാർ സഭകൾ ലത്തീൻ രൂപതാതൃത്തിക്കുള്ളിലുള്ള തങ്ങളുടെ വിശ്വാസികളുടെ അജപാലന ശുശ്രൂഷ നിർവഹിച്ചുകൊണ്ടിരിക്കുന്നതാണ്.

ഈ ചുറ്റുപാടിൽനിന്നുകൊണ്ടുവേണം ഇന്ത്യൻ സഭകൾക്ക് തങ്ങളുടെ വിശ്വാസികളുടെ അജപാലനധർമ്മനിർവഹണത്തിന് പുതിയ രൂപരേഖ റോം കണ്ടെത്തിയത്. സീറോ-മലബാർ സഭയ്ക്ക് ഇന്ത്യ മുഴുവനും ചിതറിക്കിടക്കുന്ന അവളുടെ വിശ്വാസികൾക്ക് അജപാലന ശുശ്രൂഷ  ചെയ്യാനുള്ള അവസരത്തെ ഒരുക്കികൊണ്ടുള്ള തീരുമാനത്തെ ഫ്രാൻസിസ് പാപ്പ ഇന്ത്യയിലെ എല്ലാ മെത്രാന്മാർക്കും അയച്ച കത്തിൽകൂടി വ്യക്തമാക്കുന്നു. എന്നാൽ ആ കത്തിൽ മാർപാപ്പ ഏതാനും ചില കാര്യങ്ങൾ ഊന്നിപ്പറയുന്നുണ്ട്: 1) സീറോ-മലബാർ സഭയുടെ അജപാലന ശുശ്രൂഷാതൃത്തി ഇന്ത്യമുഴുവനുമായി മാർപാപ്പ വിപുലീകരിച്ചു. 2) എറണാകുളം-അങ്കമാലി ശ്രേഷ്ഠമെത്രാപ്പോലീത്തയേയും സീറോ-മലബാർ മെത്രാൻ സിനഡിനേയും ആ അജപാലന ദൗത്യം മാർപാപ്പ ചുമതലപ്പെടുത്തിയിരിക്കുന്നു. 3) അജപാലന മേഖലയുടെ വിപുലീകരണം അധികാരത്തിൻറെയോ ആധിപത്യത്തിൻറെയൊ വളർച്ചയായി മനസ്സിലാക്കാൻ പാടില്ല. 4) ഏറെ കാലമായി ലത്തീൻ സഭയിലെ ഇടവകജീവിതത്തിലും പ്രവർത്തനങ്ങളിലും പൂർണ്ണമായി ഉൾപ്പെട്ടിരുന്ന സീറോ-മലബാർ കുടുംബപശ്ചാത്തലമുള്ള കുടുംബങ്ങൾ ലത്തീൻ ഇടവകയിൽത്തന്നെ തുടരാൻ ഇഷ്ടപ്പെടുന്നുയെങ്കിൽ ലത്തീൻ വികാരിയുടെ അജപാലനം വഴി അവർക്കത് നിർവ്വഹിച്ചു കൊടുക്കേണ്ടതാണ്. ഫ്രാൻസിസ് പാപ്പയുടെ കത്ത് ചുവടെ ചേർക്കുന്നു:

 
പരിശുദ്ധ പിതാവ് ഫ്രാൻസിസ് മാർപാപ്പ 2016 ഒക്ടോബർ 09 -ന് ഇന്ത്യയിലെ കോത്തോലിക്കാ മെത്രാന്മാർക്ക് എഴുതിയ കത്ത്

പരിഭാഷകൻ: ജോർജ് നെടുവേലിൽ, ഫ്ളോറിഡ

 
സ്നേഹമുള്ള സഹോദര മെത്രാന്മാരെ,

ചിരകാലത്തെ ചരിത്രം, സാംസ്കാരം, ആദ്ധ്യാത്മികത, ശിക്ഷണം എന്നിവകളിലൂടെയുള്ള വികസനഫലമാണ് പ്രശംസാർഹമായ  സഭാവൈവിധ്യം (verietas Ecclesiarum). അത് സഭയുടെ നിധിയാണ്; അത് കനകകഞ്ചുകമണിഞ്ഞുനിൽക്കുന്ന രാഞ്ജിയെപ്പോലെയാണ് (cf. Ps 44 and Leo XIII, Orientallum Dignitas). വേണ്ടത്ര വിളക്കെണ്ണ കരുതികൊണ്ട് ആത്മാർത്ഥതയൊടും ക്ഷമാപൂർവ്വവും തൻറെ മണവാളനെ പ്രതീക്ഷിച്ചുനിന്ന വിവേകശാലിയായ കന്യകയെപ്പോലെ, നാഥൻറെ വരവിനായി ദീർഘരാവിൽ കാത്തുനിൽക്കുന്ന ജനതയ്ക്ക് അവളുടെ വിളക്കിൻറെ വെളിച്ചം ബോധപ്രകാശമാണ്.

 സഭാജീവിതത്തിൻറെ ഈ വൈവിധ്യം അതീവ തേജസ്സോടെ എല്ലാ ദേശങ്ങളിലും ജനതകളിലും തിളങ്ങുന്നതുപോലെ ഇന്ത്യയിലും ദൃശ്യമാണ്. തോമ അപ്പോസ്തലൻറെ മതപ്രഭാഷണങ്ങളാണ് ഇന്ത്യയിലെ കത്തോലിക്കാ സഭയുടെ ഉത്ഭവം. കൽദായസഭയുടെയും  അന്ത്യോക്യൻ സഭയുടെയും പാരമ്പര്യങ്ങളുമായുള്ള ബന്ധപ്പെടലുകളും കൂടാതെ പതിനാറാം നൂറ്റാണ്ടുമുതൽ ലത്തീൻ മിഷ്യനറിമാരുടെ പരിശ്രമഫലവുമായാണ് ഈ സഭ വികസിതമായത്. ഈ മഹാരാജ്യത്തിൻറെ ക്രിസ്തുമത ചരിത്രം അങ്ങനെ മൂന്ന് വ്യത്യസ്ത സ്വയംഭരണാധികാരമുള്ള സഭകൾക്ക് രൂപം കൊടുത്തു. ഒരേ വിശ്വാസത്തിൻറെ സഭാപരമായ ആവിഷ്കരണം വ്യത്യസ്തമായ റീത്തുകളുടെ മൂന്ന് രീതിയിലുള്ള ആരാധനക്രമം, ആദ്ധ്യാത്‌മികത, ദൈവശാസ്ത്രം, ശിക്ഷണം ഇവയിലൂടെ ആഘോഷിക്കപ്പെടുന്നു. ചരിത്രത്തിൽ ഈ സാഹചര്യം ചിലപ്പോൾ സംഘർഷത്തിന് ഇടവരുത്തിയിട്ടുണ്ട്. എന്നാൽ ഇന്നു നമുക്ക് മഹത്തും മനോഹരവും സങ്കീർണ്ണവും അതുല്യവുമായ ഒരു ക്രിസ്തീയ സാന്നിദ്ധ്യത്തിൽ അഭിനന്ദിക്കാം.

കത്തോലിക്കാ സഭയുടെ വിവിധങ്ങളായ പാരമ്പര്യങ്ങളുടെ സമൃദ്ധിയുടെ മുഖം അതിൻറെ എല്ലാ തേജസ്സോടുംകൂടി ലോകത്തിന് വെളിപ്പെടുത്തുകയെന്നത് സുപ്രധാനമാണ്. 1917 -ൽ ബനഡിക്റ്റ് പതിനഞ്ചാമൻ മാർപാപ്പയുടെ ദീർഘവീക്ഷണ ഫലമായി സ്ഥാപിതമായ പൗരസ്ത്യ സഭകൾക്കുവേണ്ടിയുള്ള തിരുസംഘത്തിൻറെ സുവർണ്ണ ജൂബിലിവർഷമായി ആഘോഷിക്കുന്ന കാരണത്താൽ പൗരസ്ത്യ സഭാ പാരമ്പര്യങ്ങളെ പുനരുദ്ധരിക്കുന്നതിനും സംരക്ഷണം ഉറപ്പുവരുത്തുന്നതിനും ആ പൗരാണിക സഭകളുടെ അന്തസ്സിനെയും അവകാശങ്ങളെയും മാനിക്കുന്നതിനും പ്രോത്സാഹിപ്പിക്കുന്നു.

സഭയുടെ ആ കാഴ്ചപ്പാടിനെ രണ്ടാം വത്തിക്കാൻ കൗൺസിൽ ആശ്ലേഷിക്കുകയും ഓരോ സഭകൾക്കുമുള്ള  തനതായ പാരമ്പര്യനിധിയെ കാത്തുസൂക്ഷിക്കേണ്ടതിൻറെയും സംരക്ഷിക്കേണ്ടതിൻറെയും ആവശ്യകത  വിശ്വാസികളെ ഓർമ്മപ്പെടുത്തിയിട്ടുമുണ്ട്. "കൂടാതെ, സഭയ്ക്കുള്ളിലെ പ്രത്യേക സഭകൾ ന്യായമായ സ്ഥാനം വഹിക്കുന്നു; ദാനധർമ്മങ്ങളുടെ മുഴുവൻ കൂട്ടായ്മയുടെയും അദ്ധ്യക്ഷസ്ഥാനം വഹിക്കുന്ന പത്രോസിൻറെ സിംഹാസനത്തിൻറെ പരമാധികാരത്തെ ഒരുവിധത്തിലും എതിർക്കാതെ ആ സഭകൾ അവരുടെ പാരമ്പര്യങ്ങൾ നിലനിർത്തുന്നു (cf. Ignatius of Antioch, Ad Rom., Praef.); നിയമാനുസൃതമായ വ്യത്യാസങ്ങളെ സംരക്ഷിക്കുകയും അതേസമയംതന്നെ ആ വ്യത്യാസങ്ങൾ സഭയുടെ ഐക്യത്തിന് തടസ്സമാകാതെ സഹായകമാകുമെന്ന് കണക്കാക്കുകായും ചെയ്യൂന്നു” (Lumen Gentium, 13).

Lumen Gentium പഠിപ്പിക്കുന്നതുപോലെ, ക്രിസ്തുവിൻറെ ശരീരത്തിലെ വൈവിധ്യത്തിലെ ഐക്യം പ്രോത്സാഹിപ്പിക്കേണ്ടത് റോമിലെ മെത്രാനാണ്. ഈ ചുമതലയിൽ, രണ്ടാം വത്തിക്കാൻ കൗൺസിലിലെ ആഹ്വാനത്തെ റോമാമാർപാപ്പമാർ വിശ്വസ്തതാപൂർവ്വം വ്യാഖ്യാനിച്ച് പ്രായോഗികമാക്കുന്നു. പൗരാണികത്തത്തിൻറെ പേരിൽ ആദരിക്കപ്പെടുന്ന പൗരസ്ത്യസഭകൾ "പുഷ്ടിപ്പെടുകയും പുതിയ അപ്പോസ്തലിക ഊർജ്ജസ്വലതയോടെ അവരെ ഭരമേല്പിച്ചിരിക്കുന്ന ദൗത്യം നിർവഹിക്കുകയും വേണം" (Orientalium Ecclesiarum, 1); അവരുടെ ഉത്തരവാദിത്തം കൂടുതൽ ഫലപ്രദമായ ഉപകരണങ്ങളായിരിക്കുന്നതിനാൽ "ക്രിസ്ത്യാനികളുടെ ഐക്യം, പ്രത്യേകിച്ചും പൗരസ്ത്യ ക്രിസ്ത്യാനികളുടെ ഐക്യം, പ്രോത്സാഹിപ്പിക്കുന്നതിനുള്ള പ്രത്യേക ചുമതല" (Orientalium Ecclesiarum, 24) നിലനിൽക്കുന്നു. കൂടാതെ, അവരുടെ "തുല്യ അന്തസ്സ് [ ... ] ഒരേ ഉത്തരവാദിത്തത്തിൽ നിന്നുകൊണ്ട്  സുവിശേഷം സർവ്വലോകത്തിലും പ്രസംഗിപ്പാനും ഒരേ അവകാശങ്ങൾ അനുഭവിക്കാനും" (Orientalium Ecclesiarum, 3) അവരെ പ്രോത്സാഹിപ്പിക്കണം.

മുപ്പത് വർഷങ്ങൾക്കുമുമ്പ് എൻറെ പ്രിയപ്പെട്ട മുൻഗാമി വിശുദ്ധ ജോൺ പോൾ രണ്ടാമൻ ഇന്ത്യയുടെ മെത്രാന്മാർക്ക് ഒരു കത്തയക്കുകയുണ്ടായി. രണ്ടാം വത്തിക്കാൻ കൗൺസിലിനെ സ്വാംശീകരിച്ച് കൗൺസിലിൻറെ പഠനങ്ങളെ ഇന്ത്യയുടെ പശ്ചാത്തലത്തിൽ പ്രായോഗികമാക്കാൻ അദ്ദേഹം ശ്രമിച്ചു. നൂറ്റാണ്ടുകൾ പിന്നിട്ടിട്ടും, ഇന്ത്യയിൽ ക്രിസ്ത്യാനികൾ ജനസംഖ്യയുടെ ഒരു ചെറിയ അനുപാതം മാത്രമേയുള്ളൂ.  തത്ഫലമായി, ഐക്യത്തെ പ്രകടമാക്കേണ്ട പ്രത്യേക ആവശ്യകതയും വിഭജനത്തിൻറെ ഏതെങ്കിലും സാമ്യതകൾ ഒഴിവാക്കേണ്ടതുമുണ്ട്. ഐക്യത്തിനായുള്ള ആവശ്യവും വൈവിധ്യ സംരക്ഷണവും പരസ്പരം എതിർക്കപ്പെടുന്ന ഒന്നല്ലെന്ന് വിശുദ്ധ ജോൺ പോൾ രണ്ടാമൻ പ്രസ്താവിച്ചിട്ടുണ്ട്. "ഒരു റീത്തിൻറെ പൈതൃകത്തോടും പാരമ്പര്യങ്ങളോടുമുള്ള വിശ്വസ്തതയുടെ ആവശ്യം 'വിദേശത്തേയ്ക്ക് ചിതറിപ്പോയ ദൈവമക്കളെ ഒന്നായിത്തീർക്കുന്ന' (Jn 11: 52), അഥവാ രക്ഷകനോടൊത്ത് സഭയുടെ ദൗത്യം എല്ലാ ആളുകളുടെയും കൂട്ടായ്മയെ പ്രോത്സാഹിപ്പിക്കുന്ന, സഭയുടെ ചുമതലയെ ഇടപെടലായി വ്യാഖ്യാനിക്കരുതു്" (Epistula ad Indiae Episcopos, 28 May 1987).

അഞ്ച് ശദാബ്ദങ്ങൾക്കുമുമ്പ് ഇന്ത്യയുടെ മദ്ധ്യഭാഗത്തും വടക്കൻഭാഗത്തും "മിഷ്യൻ രൂപതകൾ" വഴി സീറോ-മലബാർ സഭ വികസിപ്പിച്ചപ്പോൾ ലത്തീൻ മെത്രാന്മാർ പൊതുവിൽ ധരിച്ചത് ഒരു അധികാര പരിധിയും ഒരു മെത്രാൻമാത്രം ഒരു പ്രത്യേക പ്രദേശത്ത് എന്നുമാണ്. ആ രൂപതകൾ ലത്തീൻ രൂപതകളിൽനിന്നും സൃഷ്ടിക്കപ്പെട്ടതാണ്. എന്നാലിന്ന് ആ പ്രദേശങ്ങളുടെമേൽ പൂർണ്ണമായ അധികാരമുള്ളതുകൂടാതെ ലത്തീൻ വിശ്വാസികളുടെമേലും സീറോ-മലബാർ വിശ്വാസികളുടെമേലും അധികാരമുണ്ട്. എന്നിരുന്നാലും, പൗരസ്ത്യസഭകളുടെ പരമ്പരാഗതമായ പ്രദേശത്തും കൂടാതെ പ്രവാസികളുൾപ്പെടുന്ന വിശാലമായ പ്രദേശത്തും (ഈ വിശ്വാസികൾ ദൈർഘ്യകാലത്തേയ്ക്ക് സ്ഥിരതാമസക്കാരാണ്) ഒരേ സ്ഥലത്തുതന്നെ സ്വയംഭരണാധികാരമുള്ള വിവിധ സഭകളിലെ കത്തോലിക്കാ മെത്രാന്മാർ തമ്മിൽ ഫലപ്രദവും അനുയോജ്യവുമായ സഹകരണം സംഭവിച്ചിരിക്കുകയാണ്. ആ സഹകരണം അത്തരം പരിഹാരത്തിന് സഭാനീതീകരണം വാഗ്‌ദാനം ചെയ്യുകമാത്രമല്ലാ ഇടയശുശ്രൂഷയുടെ ആനുകൂല്യങ്ങളെ പ്രകടമാക്കുകയും ചെയ്യുന്നു. ഇന്നത്തെ ലോകത്ത് വളരെ അധികം ക്രൈസ്ത്തവർ കുടിയേറാൻ നിർബന്ധപ്പെടും. അധികാരാതിർത്തി കവിഞ്ഞുപോകുന്നത് പതിവാകും. വിശ്വാസികളുടെ സഭാപാരമ്പര്യങ്ങളുടെ പൂർണ്ണ ആദരവ് ഉറപ്പാക്കുന്നതുകൂടാതെ അജപാലന ശുശ്രൂഷയെ ഉറപ്പാക്കാനുള്ള ഫലപ്രദമായ ഉപകരണങ്ങളായി വർദ്ധിച്ചുവരുകയുമാണ്.

ഇന്ത്യയിൽത്തന്നെ, അധികാരാതിർത്തി കവിഞ്ഞുപോകുന്നത് മേലിൽ പ്രശ്നമല്ല. കാരണം, കേരളം പോലുള്ളിടത്ത് സഭ കുറേക്കാലമായി അത് അനുഭവിച്ചുകൊണ്ടിരിക്കുന്നതാണ്. വിശുദ്ധ ജോൺ പോൾ രണ്ടാമൻറെ കത്ത് ബോംബെ-പൂന പ്രദേശത്ത് ഒരു സീറോ-മലബാർ രൂപത സ്ഥാപിക്കാൻ അംഗീകാരം നൽകി. അത് കല്യാൺ രൂപതയായി മാറി. ഡൽഹിയും അതിൻറെ അയൽ സംസ്ഥാനങ്ങളും ഉൾക്കൊള്ളുന്ന പ്രദേശത്ത് 2012-ൽ ഫരീദാബാദ് സീറോ-മലബാർ രൂപത സ്ഥാപിക്കപ്പെട്ടു. മാണ്ഡ്യാ രൂപതയുടെ അതൃത്തികൾ വിപുലീകരിച്ചുകൊണ്ട് 2015-ൽ ബാഗ്ലൂർ നഗരത്തെയും ഉൾപ്പെടുത്തി. ആ വർഷം തന്നെ, സീറോ-മലങ്കര വിശ്വാസികൾക്കായി ഒരു രൂപതയും അപ്പോസ്തലിക എക്‌സാർക്കേറ്റും സ്ഥാപിക്കപ്പെട്ടു. ഈവിധമുള്ള സഭാപരമായ അതൃത്തീ ക്ലിപ്തപ്പെടുത്തൽ സീറോ-മലകാര സഭയ്ക്ക് ഇന്ത്യയുടെ അതൃത്തി മുഴുവനും അവളുടെ വിശ്വാസികൾക്ക് അജപാലന ശുശ്രൂഷ നൽകാൻ കഴിയുന്നു.  എല്ലാ സംഭവവികാസങ്ങളിലും  പ്രശ്നങ്ങൾ ഉണ്ടെങ്കിലും, ഒരേ പ്രദേശത്ത് പല മെത്രാന്മാരുടെ സാന്നിദ്ധ്യമുണ്ടെങ്കിലും, സഭയുടെ ദൗത്യത്തിന് വിട്ടുവീഴ്ച ചെയ്യപ്പെടുന്നില്ല. നേരെമറിച്ച്, ഈ നടപടികൾ പ്രാദേശിക സഭകൾക്ക് അവരുടെ അജപാലനവും മിഷനറി പരിശ്രമങ്ങൾക്കും കൂടുതൽ പ്രചോദനവും നൽകുന്നു.

2011-ൽ എൻറെ മുൻഗാമി ബെനെഡിക്റ്റ് പതിനാറാമൻ ഇന്ത്യ മുഴുവനുമുള്ള സീറോ-മലബാർ വിശ്വാസികൾക്ക് അജപാലന ആവശ്യം നിർവഹിക്കാൻ ആഗ്രഹിച്ചു. 2013-ലെ പൗരസ്ത്യ സഭകളുടെ തിരുസംഘത്തിൻറെ പൂർണ്ണസമ്മേളനത്തിനുശേഷം അദ്ദേഹത്തിൻറെ ഉദ്ദേശം ഞാൻ സ്ഥിരീകരിച്ചു. ഇന്ത്യയിലെ സീറോ-മലബാർ സഭാഅതൃത്തിക്കുവെളിയിലുള്ള വിശ്വാസികളുടെ ഇപ്പോഴത്തെ അപ്പോസ്തലിക സന്ദർശകൻ (Apostolic Visitor) റാഫേൽ തട്ടിൽ മെത്രാനാണ്. അദ്ദേഹം പരിശുദ്ധ സിംഹാസനത്തിന് വിശദമായ ഒരു റിപ്പോർട്ട് നൽകിയിട്ടുണ്ട്. സഭയുടെ ഉന്നതതലയോഗങ്ങളിൽ ഈ വിഷയം പരിശോധനയ്ക്ക് വിധേയമായിട്ടുണ്ട്. ഈ നടപടികളുടെ ചുവടുപിടിച്ച്, ആ പ്രക്രിയ പൂർത്തിയാക്കാനുള്ള സമയം സമാഗതമായെന്ന് ഞാൻ വിശ്വസിക്കുന്നു.

ആയതിനാൽ, രണ്ട് രൂപതകൾ സ്ഥാപിച്ചുകൊണ്ടും നിലവിലുള്ള രണ്ട് രൂപതകളുടെ അതൃത്തികൾ വിപുലീകരിച്ചുകൊണ്ടും ഇന്ത്യയിലുടനീളമുള്ള സീറോ-മലബാർ വിശ്വാസികൾക്ക് അജപാലനം നൽകാൻ പൗരസ്ത്യ സഭകളുടെ തിരുസംഘത്തെ ഞാൻ അധികാരപ്പെടുത്തിയിട്ടുണ്ട്.

പുതിയ അതൃത്തികളും കൂടാതെ നിലവിലുള്ളതും പൗരസ്ത്യ സഭകൾക്കുള്ള കാനോൻ നിയമത്തിലെ മാനദണ്ഡങ്ങൾക്കനുസരിച്ച് എറണാകുളം-അങ്കമാലി ശ്രേഷ്ഠമെത്രാപ്പോലീത്തയ്ക്കും സീറോ-മലബാർ മെത്രാൻ സിൻഡിനും അജപാലന ദൗത്യം ചുമതലപ്പെടുത്തികൊടുക്കാൻ ഞാൻ ഉത്തരവായിട്ടുണ്ട്.

എൻറെ ഈ തീരുമാനം ചിലർക്ക് ആശങ്കയുടെ ഉറവിടമാകാമെങ്കിലും, വളരെയധികം സീറോ-മലബാറുകാർ അവരുടെ റീത്തിൻ പ്രകാരമുള്ള അജപാലനം നഷ്ട്ടപ്പെടുന്ന സാഹചര്യത്തിലും ഇപ്പോൾ അവർ ലത്തീൻ സഭാജീവിതത്തിൽ പൂർണ്ണമായി ഉൾപ്പെട്ടിരിക്കുന്നതിനാലും, ഉദാരവും സമാധാനപരവുമായ മനോഭാവത്തോടെ ഇത് സ്വാഗതം ചെയ്യുമെന്ന് കരുതുന്നു. എന്നിരുന്നാലും, ഇതിൽ ഉൾപ്പെട്ടിരിക്കുന്നവരിൽ ആശങ്കയ്ക്ക് കാരണമില്ലെന്ന് എനിക്ക് ബോദ്ധ്യമുണ്ട്. കാരണം, സഭാജീവിതം അത്തരം വ്യവസ്ഥകൊണ്ട് തടസ്സപ്പെടുത്താൻ പാടില്ല. ഒരു കാലത്ത്, വിവിധ വഴികളിൽ-ചിലപ്പോൾ തലമുറകളായി- സംഭാവന ചെയ്ത വിശ്വാസികളെ സ്വാഗതം ചെയ്ത സമൂഹങ്ങളെ നിർബന്ധമായി വിടേണ്ടിവരുന്ന ഒരു ഭീഷണിയായി ഇതിനെ തീർച്ചയായും വിപരീതമായി വ്യാഖ്യാനിക്കരുത്. മറിച്ച്, ഇത് ഒരു ക്ഷണമായും വിശ്വാസത്തിൽ വളരുന്നതിനും സ്വയംഭരണാധികാരസഭയിലെ കൂട്ടായ്മയുടെ  വളർച്ചയ്ക്കും അവരുടെ റീത്തിൻറെ വിലയേറിയ പൈതൃകം സംരക്ഷിച്ച് ഭാവി തലമുറകൾക്ക് കൈമാറുന്നതിനുള്ള അവസരമായും ഇതിനെ കാണണം. ഫരീദാബാദ് രൂപതയ്ക്ക് പൗരസ്ത്യ സഭകളുടെ തിരുസംഘത്തിൽനിന്ന്, സീറോ-മലബാർ വിശ്വാസ കൂട്ടായ്മയിലെ ഒരംഗം, നിയമത്തിൻറെ അടിസ്ഥാനത്തിൽ, അവനോ അവൾക്കോ വീടുള്ള സീറോ-മലബാർ ഇടവകയിലെ അംഗമാണെന്ന് സൂചിപ്പിച്ചുകൊണ്ടുള്ള നിർദ്ദേശം നേരത്തെത്തന്നെ നൽകിയിട്ടുണ്ട് (Code of Canons of the Eastern Churches, Can. 280   1). എന്നിരുന്നാലും, അതേസമയം തന്നെ അവനോ അവൾക്കോ ലത്തീൻ സഭയിലെ ഇടവകജീവിതത്തിലും പ്രവർത്തനങ്ങളിലും പൂർണ്ണമായി ഉൾപ്പെടാവുന്നതുമാണ്. വിശ്വാസികൾക്കുവേണ്ടി ഇപ്പോൾ നിലവിലുള്ള നിയമങ്ങളിൽനിന്നുള്ള അനുവാദം അവരുടെ വിശ്വാസം ശാന്തമായി അനുഷ്ഠിക്കാൻ ആവശ്യമില്ല. ലത്തീൻ വികാരിയുടെയോ സിറോ-മലബാർ വികാരിയുടെയോ അജപാലനം വഴി അവർക്കത് നിർവ്വഹിക്കാവുന്നതാണ്.

ഇന്ത്യയിലെ കത്തോലിക്കാ സഭയുടെ പാത ഒറ്റപ്പെടൽ അല്ലെങ്കിൽ വേർതിരിക്കൽ ആകാൻ കഴിയില്ല; പ്രത്യുത, ബഹുമാനത്തിൻറെയും സഹകരണത്തിൻറെയും ആയിരിക്കണം. ഒരേ പ്രദേശത്ത് വിവിധ സ്വയം ഭരണാധികാരമുള്ള സഭകളുടെ പല മെത്രാന്മാരുടെ സാന്നിദ്ധ്യം തീർച്ചയായും ഊർജ്ജസ്വലവും ആശ്ചര്യദായകവുമായ ഒരു കൂട്ടായ്മയുടെ സ്പഷ്ടമായ സാക്ഷ്യം വാഗ്‌ദാനം ചെയ്യും. രണ്ടാം വത്തിക്കാൻ കൗണ്സിലിൻറെ കാഴ്ചപ്പാടും ഇതുതന്നെയാണ്. ഞാൻ അത് വീണ്ടും ഉദ്ധരിക്കുന്നു: "സഭയുടെ എല്ലാ ഭാഗങ്ങൾക്കിടയിലും അടുത്ത കൂട്ടായ്‌മാബന്ധം നിലനിൽക്കുന്നു. അങ്ങനെ അവർ ആത്മീയ സമ്പത്ത്, പ്രേഷിത പ്രവർത്തകർ, താൽകാലിക വിഭവങ്ങൾ പങ്കുവെയ്ക്കുന്നു. ദൈവജനത്തിലെ അംഗങ്ങൾ മേൽപറഞ്ഞ വിഭവങ്ങൾ പൊതുവായി പങ്കിടാൻ വിളിക്കപ്പെട്ടവരാണ്. ഓരോ സഭയ്ക്കും അപ്പോസ്തലൻറെ വചനങ്ങൾ സാധുവാണ്: ' ഓരോരുത്തനും തനിക്കു കിട്ടിയ ദാനത്തെ ദൈവത്തിൻറെ വിവിധ ദാനങ്ങളുടെ ഉത്തമനായ കാര്യസ്ഥനെന്ന നിലയിൽ മറ്റെല്ലാവർക്കുംവേണ്ടി ഉപയോഗിക്കട്ടെ' (1 Pet 4: 10) (Lumen Gentium, 13). ആ ചൈതന്യത്തിൽ, ഇന്ത്യയിലെ പ്രിയപ്പെട്ട സഭകളോട്, ഉദാരതയും ധീരതയുമുള്ളവരായിരിക്കാനും അവർ സാഹോദര്യത്തിൻറെയും പരസ്പര സ്നേഹത്തിൻറെയും  ചൈതന്യത്തിൽ സുവിശേഷത്തിന് സാക്ഷ്യം വഹിക്കാൻ ഞാൻ അഭ്യർത്ഥിക്കുന്നു. സീറോ-മലബാർ സഭയ്ക്ക്, ലത്തീൻ സഭയുടെ പശ്ചാത്തലത്തിൽ, അവരുടെ വൈദികരുടെയും സന്യസ്തരുടെയും വിലമതിക്കുന്ന ജോലി തുടരുകയും, ഭാഗവാക്കാകാൻ ലത്തീൻ ഇടവകകളെ തിരഞ്ഞെടുക്കുന്നെന്നിരുന്നാലും സീറോ-മലബാർ വിശ്വാസികൾക്കുവേണ്ടി അവരുടെ ലഭ്യത നിലനിർത്തണം, കാരണം, ആദിമസഭയിൽനിന്ന് കുറെ സഹായം അവർ അഭ്യർത്ഥിച്ചെന്നിരിക്കാം. സ്വന്തമായി പള്ളിക്കെട്ടിടങ്ങൾ ഇല്ലാത്ത സീറോ-മലബാർ സമൂഹത്തിന് ലത്തീൻ റീത്ത് സഭ ഉദാരമായ ആഥിത്യം തുടർന്നും വാഗ്‌ദാനം ചെയ്യാൻ സാധിക്കും. സ്വയം ഭരണാധികാരമുള്ള എല്ലാ സഭകളും തുടർന്നും സഹകരിക്കണം, ഉദാഹരണത്തിന് ധ്യാനങ്ങൾ, വൈദികർക്കുവേണ്ടിയുള്ള സെമിനാറുകൾ, ബൈബിൾ കോൺഫറൻസുകൾ, പൊതുതിരുനാൾ ദിനാഘോഷങ്ങൾ, എക്യൂമെനിക്കൽ പരിശ്രമങ്ങൾ. ആദ്ധ്യാത്മിക സൗഹൃദത്തിൻറെയും പരസ്പര സഹായത്തിൻറെയും വളർച്ചകൊണ്ട് ഏതങ്കിലും പിരിമുറുക്കങ്ങളെയും ആശങ്കകളെയും പെട്ടെന്ന് അതിജീവിക്കണം. സീറോ-മലബാർ സഭയുടെ ഈ അജപാലന മേഖലയുടെ വിപുലീകരണം അധികാരത്തിൻറെയോ ആധിപത്യത്തിൻറെയൊ വളർച്ചയായി ഒരുവിധത്തിലും മനസ്സിലാക്കരുത്. മറിച്ച്, അതിനെ ആഴത്തിലുള്ള കൂട്ടായ്‌മക്കുള്ള വിളിയായി കാണണം. അതൊരിക്കലും ഐകരൂപ്യമായി ഗ്രഹിക്കുകയുമരുത്. ത്രിത്വത്തിൻറെ സ്തുതിപ്പുകൾ പാടിയവാനും പിതാവിൻറെയും പുത്രൻറെയും പരിശുദ്ധാരൂപിയുടെയും അത്ഭുതകരമായ കൂട്ടായ്മ ഉള്ളവനുമായ വിശുദ്ധ ആഗസ്തീനോസിൻറെ വാക്കുകൾപോലെ ഞാനും നിങ്ങളോട് ചോദിക്കുന്നു: വർദ്ധിച്ച അനുകമ്പയ്ക്കുള്ള ഇടം (Sermon 69, PL 5, 440.441). സ്നേഹത്തിലും, കൂട്ടായ്മയിലും, സേവനത്തിലും വളർച്ച ഉണ്ടാകെട്ടെ.

പ്രിയ സഹോദര മെത്രാന്മാരെ, നിങ്ങൾക്കെല്ലാവർക്കും പരിശുദ്ധ കന്യകാമറിയത്തിൻറെ മദ്ധ്യസ്ഥത  ഞാൻ നേരുന്നു. പ്രാർത്ഥനയിൽ നിങ്ങളോടുകൂടി ആയിരിക്കുമെന്ന് ഞാൻ ഉറപ്പുതരുന്നു. നിങ്ങൾക്കെല്ലാവർക്കും ഇന്ത്യയിലെ സഭയ്ക്കും വിശ്വാസികൾക്കും എൻറെ സ്ലൈഹികാനുഗ്രഹങ്ങൾ നൽകുന്നു. നിങ്ങൾ എനിക്കുവേണ്ടി പ്രാർത്ഥിക്കാൻ ഞാൻ ചോദിക്കുകയും ചെയ്യുന്നു.

 വത്തിക്കാനിൽനിന്ന്, 09 ഒക്ടോബർ 2017

ഫ്രാൻസിസ്

പാര പരോപകാരമാകുന്നതെങ്ങനെ?

ഇപ്പന്‍ ഫോണ്‍: 9446561252

(2017 ഡിസംബർ ലക്കം 'സത്യജ്വാല'യിൽനിന്ന് )

കര്‍മ്മങ്ങളുടെ അടിസ്ഥാനത്തില്‍ ഭര്‍ത്തൃഹരി മനുഷ്യരെ ഉത്തമാധമമധ്യമന്മാരായി തിരിക്കുന്നു:
''ഏകേ സത്പുരുഷഃ പദാര്‍ത്ഥഘടകാഃ
സ്വാര്‍ത്ഥം പരിത്യജ്യ യേ
സാമാന്യസ്തു പരാര്‍ത്ഥമുദ്യമ ഭൃത
സ്വാര്‍ത്ഥാവിരോധേന യേ
തേമീ മാനുഷ രാക്ഷസാഃ പരഹിതം
സ്വാര്‍ത്ഥായനിഘ്‌നന്തി യേ
യേതുഘ്‌നന്തി നിരര്‍ത്ഥകം പരഹിതം
തേ കേ ന ജാനീമഹേ''
(മഹാന്മാര്‍ സ്വകാര്യം ത്യജിച്ച് അന്യര്‍ക്കുവേണ്ടി ജീവിക്കുന്നു. നല്ല മനുഷ്യര്‍ സ്വകാര്യം വേണ്ടെന്നു വയ്ക്കാതെ അന്യര്‍ക്കുവേണ്ടി പ്രവര്‍ത്തിക്കുന്നു. നീചന്മാര്‍ സ്വകാര്യത്തിനുവേണ്ടി അന്യരെ ഉപദ്രവിക്കുന്നു. തനിക്ക് ഒരുപകാരവുമില്ലാതെ മറ്റുള്ളവരെ ഉപദ്രവിച്ചു സുഖിക്കുന്നവരെ ഏതു വിഭാഗത്തില്‍പ്പെടുത്തണമെന്ന് എനിക്കറിയില്ല.)
കുമാരകവിയും കുറിക്കുന്നു:
''അന്യജീവനുതകി സ്വജീവിതം
ധന്യമാക്കുമമലേ വിവേകികള്‍''
ജീവിതം ധന്യമാകുന്നത് അന്യജീവനുതകുമ്പോഴാണ്. പരോപകാരത്തെ ഒരു പുണ്യമായി ലോകം അംഗീകരിച്ചിരിക്കുന്നു. എനിക്ക് എതിര്‍പ്പില്ല. പക്ഷേ, ഏറ്റവും ശ്രേഷ്ഠമായ പരോപകാരം പരോപദ്രവമാണെന്നു സമര്‍ത്ഥിച്ച് ഭര്‍ത്തൃഹരിയോട് വിയോജിക്കാനാണ് ഈ കുറിപ്പ്. ജനനവേളയില്‍ എല്ലാവരുടെയും തലയാണല്ലോ ആദ്യം പുറത്തുവരുന്നത്. എന്റെ മുതുകാണാദ്യം പുറത്തുവന്നത്. ഞാനിങ്ങനെ ഒരു തലതിരിഞ്ഞവനായത് അതുകൊണ്ടാവാം.
ആളുകളുടെ പരോപകാരപ്രവൃത്തികളെ നിരീക്ഷിക്കുക. അജ്ഞതമൂലം ഇക്കാര്യത്തിലും അവര്‍ ചതിക്കപ്പെടുന്നില്ലേ? രാവിലെ ഒരുത്തനു ഭിക്ഷ കൊടുക്കുന്നു. വൈകുന്നേരം വിയര്‍പ്പില്‍ കുളിച്ച് പതിവുള്ള ക്വാര്‍ട്ടര്‍ ജവാനു ക്യൂ നില്‍ക്കുന്ന നിങ്ങളുടെ മുമ്പില്‍ രണ്ടാമത്തെ സീസര്‍ ഫുള്ളിനുവേണ്ടി ആടിയാടി നില്‍ക്കുന്ന അവന്‍. അര്‍ഹിക്കുന്നവര്‍ക്കു കൊടുക്കണം. അര്‍ഹിക്കുന്നവര്‍ അഭിമാനംമൂലം ദുരിതങ്ങളുടെ നിറപറകള്‍ നിത്യേന അളന്ന് കുടിലുകളില്‍ കുത്തിയിരിക്കുന്നു. വീട്ടില്‍ സഹായം ചോദിച്ചുവന്ന അപരിചിതനായ ഒരു ശുഭ്രവസ്ത്രധാരിയോട്, 'ഇവിടെ വരുന്നവര്‍ക്കൊക്കെ ഞാന്‍ അഞ്ചു രൂപയാണു കൊടുക്കുന്നതെന്നും അതു തന്നാല്‍ ചേട്ടന്‍ മേടിക്കുമോ'ന്നും ഞാന്‍ ചോദിച്ചു. അയാള്‍ ഒന്നാന്തരം കുടുംബത്തില്‍ പിറന്നവനാണെന്നും എന്റെ അമ്പതുരൂപാപോലും തെണ്ടിവാങ്ങേണ്ട ഗതികേട് അയാള്‍ക്കില്ലെന്നും ആക്രോശിച്ച് അയാള്‍ സ്ഥലം കാലിയാക്കി. ഇവന്‍ ഒരു ഐ.പി. ഭിക്ഷാടകനാണ്. മിനിമം നൂറുരൂപാ കൊടുത്താല്‍ അവന്‍ വാങ്ങാന്‍ കനിയാം.
കാമ്പസിന്റെ മുമ്പിലുള്ള വെയിറ്റിങ്ങ് ഷെഡ്ഡില്‍ ബസുകയറാന്‍ നിന്ന സതീര്‍ത്ഥ്യയോട് എന്റെ ഒരു സുഹൃത്ത് കേരളപാണിനീയത്തിലെ അംഗപ്രത്യയമോ ലിംഗപ്രത്യയമോ എന്ന വ്യാകരണപ്രശ്‌നം ചര്‍ച്ചചെയ്യുകയായിരുന്നു. കഷ്ടകാലത്തിന് അവളൊരു സുന്ദരിയായിരുന്നു. അവള്‍ പോയിക്കഴിഞ്ഞ് ആ വെയിറ്റിങ്ങ് ഷെഡ്ഡിലെ സ്ഥിരം ഭിക്ഷക്കാരന്‍ സുഹൃത്തിന്റെ ചെവിയില്‍ ചെന്നു മന്ത്രിക്കുകയാണ്, 'അപ്പോഴേ ഇത്രയും നേരം സുഖിച്ചതിന്റെ കാശിങ്ങെടുത്തേ' എന്ന്. അവര്‍ സംസാരിച്ചതിലെ 'ലിംഗം' 'ലിംഗം' എന്ന വാക്കുമാത്രമേ അവനു മനസ്സിലായിക്കാണൂ. ഇവനൊരു സദാചാരഗുണ്ടാത്തെണ്ടിയാണ്.
ഇനിയൊരു വിഭാഗമുള്ളത് വി.ഐ.പി.കളാണ്. മഹാത്മാവ് പരുത്തിനൂല്‍കൊണ്ടു നെയ്‌തെടുത്ത വെണ്‍മയുള്ള ആശയലോകംകൊണ്ടു ദുര്‍മേദസു പൊതിഞ്ഞാണ് അവന്റെ വരവ്. ഓന്തിനെപ്പോലെ ചുവപ്പും പച്ചയും കാവിയുമായി ഇക്കൂട്ടര്‍ നിറംമാറും. ഇവനെ പേടിക്കണം. നിങ്ങളെത്ര കരുത്തനായ കാട്ടുപോത്താണെങ്കിലും ഇവനെ പിണക്കിയാല്‍ ഇവന്റെ അനുയായികളായ ചെന്നായ്ക്കള്‍ നിങ്ങളെ അനങ്ങാന്‍ സമ്മതിക്കാതെ പൃഷ്ടഭാഗത്തുനിന്നു കടിച്ചുതിന്നു തുടങ്ങും.
ഇനിയുള്ള ദേഹങ്ങള്‍ വിശുദ്ധ വി.വി.ഐ.പി.കളാണ്. കര്‍ത്താവിനെ തറച്ചുകൊന്ന കുരിശ് 22-കാരറ്റ് സ്വര്‍ണ്ണത്തില്‍ വാര്‍ത്ത് ഇവര്‍ കഴുത്തില്‍ തൂക്കിയിരിക്കും. കുഞ്ഞാടുകളെ വിഴുങ്ങുന്ന വിഷയത്തില്‍ ഇവരുടെ ഗുരു മുതലയാണ്. ഗുരുഭക്തിമൂലം ഇവര്‍ ഗുരുവക്ത്രത്തിന്റെ ആകൃതിയിലുള്ള ഒരു തൊപ്പിയാണു ധരിക്കുന്നത്. തങ്ങളുടെ വക്രതയുടെ പ്രതീകമാണ് അവരുടെ വളഞ്ഞ ചെങ്കോല്‍. മോതിരത്തില്‍ ഇവര്‍ കോഴിമുട്ടയുടെ വലിപ്പമുള്ള രത്‌നം പതിക്കുന്നത് ജാടകാട്ടാനല്ല, കേട്ടോ! സ്ത്രീകള്‍ മുത്തുമ്പോള്‍ അവരുടെ പവിഴാധരങ്ങള്‍ സ്പര്‍ശിക്കരുതല്ലോ. ഇവര്‍ നമ്മുടെ കുപ്പമാടത്തിലേക്ക് എഴുന്നള്ളുകയില്ല. പാമ്പിനെ വരുത്തി വിഷമിറക്കാന്‍ വിദഗ്ദ്ധരാണിവര്‍. നമ്മളിവരുടെ കൊട്ടാരത്തില്‍ ചെന്ന് ക്യൂനിന്ന് ഇവര്‍ക്കു ഭിക്ഷ കൊടുത്തുകൊള്ളും. ഇവരുടെ പണക്കൊതിയെ പൂര്‍ത്തീകരിക്കാന്‍ ശ്രമിക്കുന്നത് മണ്ണെണ്ണയൊഴിച്ച് തീ കെടുത്താന്‍ ശ്രമിക്കുംപോലെ വ്യര്‍ത്ഥമാണ്. പ്രാചീന റോമന്‍പ്രമാണിമാര്‍ക്ക് വിരുന്നുശാലയോടനുബന്ധിച്ച്, വയറുനിറയുമ്പോള്‍ തൊണ്ടയില്‍ കൈയിട്ട് ഛര്‍ദ്ദിക്കാന്‍ ഇടമുണ്ടായിരുന്നു. വീണ്ടും വന്ന് വിശിഷ്ടവിഭവങ്ങള്‍ വിഴുങ്ങാനാണ്. ഖജനാവു നിറയുമ്പോള്‍ ഇവരും ഇടയലേഖനങ്ങള്‍ ഛര്‍ദ്ദിക്കും. 'രൂപതാ... രൂപതാ, ഞാനുമൊരു സൂപ്പര്‍ സ്‌പെഷ്യല്‍ കാശുപത്രി പണിയട്ടെ.' നമ്മള്‍ ഭയഭക്തിപുരസ്സരം മടിശ്ശീലയഴിക്കുന്നു. നമ്മുടെ സ്വര്‍ഗ്ഗ-നരകവാതിലുകളുടെ റിമോട്ട് കണ്‍ട്രോള്‍ ഇവരുടെ കൈയിലാണല്ലോ. ഒരു ഭിക്ഷക്കാരിമുത്തശ്ശി ദേവാലയത്തിന് രണ്ടരലക്ഷം രൂപ സംഭാവനചെയ്തത് ഇന്നത്തെ പത്രത്തില്‍ വായിച്ചതേയുള്ളൂ.
ഭിക്ഷ കൊടുക്കുന്നവര്‍ മൂന്നു വിഭാഗമുണ്ട്. ഒന്നാമത്തെ കൂട്ടര്‍ ശുദ്ധാത്മാക്കളാണ്. അംബാനിയെക്കാള്‍ സമ്പന്നനായ മെത്രാനു കൊടുക്കുന്ന ഭിക്ഷപോലും പരോപകാരമാണെന്ന ഉത്തമബോദ്ധ്യത്തോടെയാണ്! അവര്‍ വിയര്‍പ്പിന്റെ വിലയുടെ ദശാംശത്തില്‍ കൂടുതല്‍ കൊടുക്കുന്നു. രണ്ടാമത്തെ കൂട്ടര്‍ ഒളിച്ചോട്ടക്കാരാണ്. ഇവര്‍ പണക്കാരാണ്. വരുമാനത്തിന്റെ ഒരംശം പ്രൊഫഷണല്‍ തെണ്ടിമുതല്‍ മെത്രാന്‍വരെയുള്ളവര്‍ക്കു വീതംവെച്ച് ദൈവത്തിനുള്ള കടം വീട്ടി എന്ന മനസ്സമാധാനത്തോടെ ജീവിക്കുന്നവര്‍. കൂദാശകള്‍ നിഷേധിക്കാതിരിക്കാനുള്ള റൗഡിഫീസും കൂടിയാണിത്. സ്വര്‍ഗ്ഗക്കൊതിയും നരകഭീതിയും ഇവര്‍ക്ക് കലശ്ശലായിരിക്കും. അടുത്ത കൂട്ടര്‍ ഭൂമിക്കു ബ്രഹ്മ വെച്ച കള്ളന്മാരാണ്. കട്ടുണ്ടാക്കിയ കാശില്‍ ഒരു പങ്ക് അവര്‍ ദൈവത്തിനും മെത്രാനും രാഷ്ട്രീയക്കാരനും കൈക്കൂലിയായി കൊടുക്കുന്നു. സ്വര്‍ഗ്ഗ-നരകങ്ങളില്ലെങ്കിലും അവനു നഷ്ടമില്ല. അവനെ സംബന്ധിച്ച് ഇത് നല്ലൊരു ഇന്‍വെസ്റ്റ്‌മെന്റാണ്. മെത്രാനുകൊടുക്കുന്നത്, കഴിയുമെങ്കില്‍ 45 മെത്രാന്മാരും കൂടിവന്ന് അവന്റെ അപ്പനെ കുഴിയിലിറക്കാനാണ്. അതുയര്‍ത്തുന്ന സോഷ്യല്‍സ്റ്റാറ്റസിലാണവന്റെ കണ്ണ്.
പരോപകാരത്തിന്റെ പരമപദത്തിലെത്തി ജീവിതസായൂജ്യം നേടുവാന്‍ നിങ്ങള്‍ ആഗ്രഹിക്കുന്നുണ്ടോ? ഭിക്ഷാടകരില്ലാത്ത ലോകം സൃഷ്ടിക്കലാണത്. നിങ്ങളുടെ മണിയും തുണിയും ജീവനും അതിനുവേണ്ടി സമ്പൂര്‍ണ്ണമായി സമര്‍പ്പിക്കേണ്ടിവരും. വ്യവസ്ഥയുടെ കാവലാളന്മാര്‍ തുടക്കംമുതലേ നിങ്ങളെ സസൂക്ഷ്മം നിരീക്ഷിച്ചുകൊണ്ടിരിക്കും. നിങ്ങളെ കൈകാര്യം ചെയ്യുന്നതിന് അവര്‍ക്ക് 'വണ്‍, ടൂ, ത്രീ'യുടെ മെതേഡുകളുണ്ട്. ആദ്യപടിയായി, നിങ്ങളാര്‍ക്കുവേണ്ടി ജീവിതം സമര്‍പ്പിച്ചുവോ അവരെക്കൊണ്ടു നിങ്ങളെ ഭ്രാന്തനെന്നു വിളിപ്പിക്കും. അവസാനപടി അന്ത്യകൂദാശയാണ്. ഇതുവരെയായിട്ടും നിങ്ങള്‍ കൊല്ലപ്പെട്ടില്ലെങ്കില്‍ അതിന്റെ അര്‍ത്ഥം നിങ്ങളുടെ പോരാട്ടത്തില്‍ എവിടെയോ മായംകലര്‍ന്നിട്ടുണ്ടെന്നതാണ്.
മരണഭയമുള്ളവര്‍ക്കും ചെറിയ കാര്യങ്ങള്‍ ചെയ്ത് വലിയ ഫലങ്ങള്‍ ഉളവാക്കാം. 'സഭ ജീവകാരുണ്യത്തില്‍ ശ്രദ്ധിക്കുക' എന്നെഴുതി പത്തു പോസ്റ്റര്‍ ഒട്ടിച്ചുകൂടേ? നിയമവിധേയമാണത്. നിങ്ങള്‍ക്ക് അമ്പതുരൂപയേ ചെലവാകൂ. വികാരി വികാരഭരിതനാകും. രൂപത അധികം രൂപയിറക്കും. ചെറിയ ഇരയിട്ട് വലിയ മീന്‍ പിടിക്കുന്ന ബുദ്ധിയാണിത്. അര്‍ഹിക്കുന്നവര്‍ക്ക് 50 കോടിയുടെ സഹായം ചെയ്തതിന്റെ സംതൃപ്തി നിങ്ങള്‍ക്കും ലഭിക്കും.
ഭൂരിപക്ഷ ഭൂരിസുഖത്തിനുവേണ്ടി പ്രവര്‍ത്തിക്കുന്ന നിങ്ങള്‍ക്ക് അനിവാര്യമായും ഒരു ന്യൂനപക്ഷത്തിന്റെ ശത്രുവാകേണ്ടിവരും. നീതിക്കുവേണ്ടിയുള്ള പോരാട്ടം അനീതിയുടെ ഗുണഭോക്താക്കളോടു കാട്ടുന്ന 'അനീതി'യാണ്. പുലിക്കുന്നനെയും പുലിക്കുന്നന്റെ പിള്ളേരെയും മതമാഫിയാ പാരയായി കാണുന്നതതുകൊണ്ടാണ്. പാര പരമമായ പരോപകാരമാണെന്നു പറയുന്നതും അതുകൊണ്ടാണ്. വിശക്കുന്നവര്‍ക്കു ഭക്ഷണം കൊടുക്കുന്നവനെ വിശുദ്ധനെന്നും വിശപ്പിന്റെ കാരണമായ അനീതിക്കെതിരെ പോരാടുന്നവനെ പാരയെന്നും വിളിക്കുന്നതെന്തുകൊണ്ടാണെന്നു വ്യക്തമായല്ലോ. യേശു ഈ പാരയെ ആശീര്‍വ്വദിക്കുന്നു. 'നീതിക്കുവേണ്ടി പോരാടുന്നവര്‍ ഭാഗ്യവാന്മാര്‍. സ്വര്‍ഗ്ഗരാജ്യം അവര്‍ക്കുള്ളതാകുന്നു.' അവര്‍ക്കേ ഭൂമിയില്‍ സ്വര്‍ഗ്ഗരാജ്യം സൃഷ്ടിക്കാനാവൂ എന്ന് അവിടുത്തേക്കറിയാമായിരുന്നു; ഇതിനപ്പുറത്ത് വേറൊരു സ്വര്‍ഗ്ഗരാജ്യം ഇല്ലെന്നും.
കോളേജ്കുമാരനായിരുന്ന കാലത്ത് എന്റെ ഒരു ഹോസ്റ്റല്‍മേറ്റ് പറഞ്ഞതാണ്. അനന്തമായ രതിമൂര്‍ച്ഛ-അതാണു സ്വര്‍ഗ്ഗീയസുഖങ്ങളിലെ മാസ്റ്റര്‍പീസ്. അനന്തമായ വിശപ്പും വിശിഷ്ടഭോജ്യങ്ങളുമാവും ശാപ്പാട്ടുരാമന്റെ സ്വര്‍ഗ്ഗം. ഗുണ്ടര്‍ട്ടിന് ഒരു ഭാഷ പഠിച്ചുതീരുമ്പോള്‍ പുതിയൊരു ഭാഷ റെഡിയായാല്‍ മതി. നരകത്തിലാകട്ടെ ഒന്നുകില്‍ എണ്ണയിലിട്ടു പൊരിക്കുന്നു അല്ലെങ്കില്‍ തീയിലിട്ടു ചുടുന്നു. സ്വര്‍ഗ്ഗക്കൊതിയോ നരകഭീതിയോ തരിമ്പുമില്ലാതെ നീതിക്കുവേണ്ടി പോരാടി മരിക്കുന്ന അവിശ്വാസിയാണ് എന്റെ നോട്ടത്തില്‍ ഏറ്റവും ശ്രേഷ്ഠനായ പരോപകാരി. മരിക്കാനേ അവന് അവകാശമുള്ളൂ. കൊല്ലാനില്ല.


Tuesday, January 16, 2018

നല്ല ഒരു കള്ളനാകുവാൻ .... മത്സരിക്കുകയാണ്...

അഭിവന്ദ്യ ഫിലിപ്പോസ് മാർ ക്രിസോസ്റ്റം വലിയ തിരുമേനി  വിവിധ സഭകളിലെ ബിഷപ്പൻമാർക്കാnയി ക്ലാസ് എടുക്കുകയായിരുന്നു. "കർത്താവ്  എന്താണ് പഠിപ്പിച്ചത് ' എന്റെ വചനങ്ങളെ അനുസരിച്ച് നടക്കുന്നവർ സ്വർഗത്തിൽ പോകും '  മറ്റൊന്നുകൂടി കർത്താവ് പറഞ്ഞിട്ടുണ്ട് 'ഈ ലോകത്തിൽ എന്റെ സാക്ഷികളായി പ്രവർത്തിക്കുന്നവർ സ്വർഗ്ഗരാജ്യത്തിനു അവകാശികൾ ആകും ' പക്ഷെ യേശു ആരെയും  സ്വർഗ്ഗത്തിൽ കൊണ്ടുപോയില്ല . ഇത് ശരിയല്ല എന്ന് തോന്നിയതിനാൽ ആവാം കർത്താവിന്റെ ജീവിതാന്ത്യത്തിൽ ഒരാളെ സ്വർഗ്ഗത്തിലേക്ക് കൊണ്ടു പോകാൻ തീരുമാനിച്ചത് . കൊണ്ടുപോകാൻ തീരുമാനിച്ചത് സഭകളുടെ ബിഷപ്പൻമ്മാരെ അല്ല, പിന്നെ ആരെയാ തിരഞ്ഞെടുത്തത്? , ഒരു കള്ളനെ! കർത്താവിനോടൊപ്പം ക്രൂശിക്കപ്പെട്ട കള്ളനെ"   അൽപനേരം നിശബ്ദനായി നിന്നശേഷം ക്രിസോസ്റ്റം തിരുമേനി തുടർന്നു "സ്വർഗ്ഗരാജ്യത്തിൽ കയറിപ്പറ്റാനുള്ള ശ്രമത്തിന്റെ ഭാഗമായിട്ടായിരിക്കാം ബിഷപ്പൻമാർ എല്ലാം ഇന്ന് വാശിയോടെ മത്സരിക്കുകയാണ്,.....നല്ല ഒരു കള്ളനാകുവാൻ......

Monday, January 15, 2018

ഞങ്ങൾ ആവശ്യപ്പെടുന്നത്

ജോസഫ് തേനമ്മാക്കൽ കഴിഞ്ഞയാഴ്ച നടന്ന സീമ (!) സഭ സീനഡിനും അതിന്റെ കുട്ടിക്കമ്മറ്റിക്കും സമ്മതിക്കേണ്ടി വന്ന കുറെ കാര്യങ്ങൾ:

1)സിനഡ് ഒരു ഉപസമിതിയെ വസ്തു ഇടപാടുകളെ പററി പഠിക്കാൻ വയ്ക്കേണ്ടി വന്നു
2) അതിരൂപതാ വൈദിക കൗൺസിലിനും ആർച്ചുബിഷപ്പിനും മുന്നിൽകഴിഞ്ഞ
P. C യിൽ, സമർപ്പിച്ചു ചർച്ചക്കെടുണ്ടിയിരുന്ന, ആർച്ചുബിഷപ്പു തന്നെ നിയമിച്ച ഇൻക്വയറി കമ്മീഷൻന്റെ റിപ്പോർട്ട് ഈ ഉപസമിതി പഠിച്ചു; ചർച്ച ചെയ്തു.(അപ്പോൾ,4/1/18 ലെ ഒളിച്ചു കളിക്കു പുറകിൽകളിയുണ്ടാ
യിരുന്നു. നാടകാന്തം കവിത്വം: താൻ കുഴിച്ച കുഴിയിൽ താൻ തന്നെ വീഴും!
3) ഒരു രൂപതയിലെ വൈദിക സമിതിയുമായി, സീനഡൽ കമ്മിഷനു ചർച്ച നടത്തേണ്ടി വന്നു.അതും ലിറ്റർജി
ക്കലോ,അജപാലനപരമോ,ഓഖി ദുരന്തമോ, മദ്യവർജ്ജന -പരിവ
ർത്തിത ക്രൈസ്ത പ്രശ്നങ്ങളോഒന്നും
ചർച്ച ചെയ്യാനല്ല; മൂന്നേക്കർ ഭൂമി ആർ, എപ്പോൾ, എങ്ങനെയൊ
ക്കെ കാശു കിട്ടിയാണോ അതോ ആടിനെ പ്ലാവില കാണിച്ചു നടത്തുന്നതു പോലെ, ഇടയനെ കുഞ്ഞാട് ,ഉണങ്ങി
ക്കിടക്കുന്ന പുൽ
മേട്ടിലേക്കു നയിച്ചു കൊണ്ടുപോയിവിറ്റതാണോ ഇങ്ങനെയുള്ള ശുദ്ധ ആദ്ധ്യാത്മിക വിരുദ്ധ ഭൗതിക കാര്യം ചർച്ച ചെയ്യാൻ!
4) നഷ്ടം നികത്താനുള്ള നടപടികളെടുക്കണം. അതു തന്നെയാണ് അരിയാഹാരം കഴിക്കുന്ന ഞങ്ങളീക്കഴിഞ്ഞ കുറെ മാസങ്ങളായി പറഞ്ഞുകൊണ്ടിരുന്നത്. നിങ്ങൾ ഒരു പക്ഷേ
സൂചിപ്പിക്കുന്നത്, മോദിയാൽ വന്നു പെട്ടെന്നു നിതാന്ത വന്ദ്യ ശ്രീമാൻ മാർ പറയുന്ന കുറെ കോടികളെപ്പറ്റിയാ
യിരിക്കും;കോടികൾ
ക്കുപരി, ആ ചിതലു
പിടിക്കുന്ന കോടി ക്കഴുക്കോലുകൾക്കു മുകളിൽ നുണകൾ കൊണ്ടു നിങ്ങൾ പടുത്തുയർത്തിയ അധാർമ്മികതതയാണ്, അതുവഴി രൂപതക്കു വന്നു ഭവിച്ച അപചയം ആ നഷ്ടം ആരെങ്ങനെ നികത്തും.? (വല്യേട്ടനെ ഇവിടെയാണ് കുഞ്ഞനുജന്മാർക്കു പേടി!)
5) നഷ്ടപരിഹാരവും വാങ്ങിച്ചെടുക്കണം. തീർച്ചയായും വേണം. പക്ഷേ, ഞങ്ങള് ഇഷ്ടപ്പെടുന്നത് പണമായ നഷ്ട പരിഹാരമല്ല:
@ഇതിനു കാരണക്കാ
രായവരെല്ലാം സ്ഥാന
ത്യാഗംചെയ്യണം
@ എഗ്രിമെന്റ് വ്യവസ്ഥകൾ സർവതും ലംഘിച്ചു നടത്തിയ വില്പനകൾ മുഴുവൻ റദ്ദുചെയ്യിച്ച്, ഗ്ലോബലായി വളർന്ന സഭയുടെ സീനഡ് ഞങ്ങളുടെ ആ,വില്പന നടത്തപ്പെട്ട "തുണ്ടുകൾ " ഒന്നു വീണ്ടെടുത്തുതരൂ നഷ്ടപരിഹാരമായി!
@ കരിഞ്ഞു കിടക്കുന്ന പുൽത്തകിടിയിലേക്ക് നയിക്കപ്പെട്ട്  കാനോനിക സമിതികളുടേയും ആലോചനാ സമിതികളു
ടേയും അംഗീകാരമില്ലാതെ
ബാങ്കിൽ നിന്ന് കടമെടു
ത്ത് വാങ്ങിയ 'സെക്യുരിറ്റി ഹെക്ടറുകൾ ' കളുടെ ആധാരങ്ങൾ റദ്ദുചെയ്ത് കൊടുത്ത കാശും, സ്റ്റാമ്പ് ഡ്യാട്ടിയും, രജിസ്ട്രേഷൻ ഫീയും വില്പന നടത്തിയ വരിൽ നിന്ന് തിരികെ വാങ്ങാമോ ?
ഈ @കൾ രണ്ടും അപ്രായോഗികം അപ്പോൾ പിന്നെ എന്തു നഷ്ട
പരിഹാരം?ഇനി, വേണ
മെങ്കിൽ ഒരു വിദഗ്ദ സമിതിയെ വച്ചന്വേ
ഷിക്കാനുമുണ്ട് ഒരു ശിപാർ ശ.എന്തന്വേ
ഷിക്കാൻ? വിറ്റ ഭൂമിയുടെ ഫെർട്ടിലൈസർ കണ്ടൻന്റ്?, വാങ്ങിയ ഭൂമിയിലെ ജല - പാറ ലഭ്യത? കഷ്ടം തന്നെ!
ഞങ്ങൾ ആവശ്യപ്പെടുന്നത് ഇപ്പോൾ ഒന്നു മാത്രം: വൈദിക സമിതി മുമ്പാകെആർച്ചുബിഷപ്പിനു സമർപ്പിക്കേണ്ടി
യിരുന്ന റിപ്പോർട്ട് ഇനി വായിക്കാനും ചർച്ച ചെയ്യാനും ലെയ്ററി എന്ന നിലക്ക് ഞങ്ങൾക്കവകാ
ശമുണ്ട്, അത്, ബിഷപ്പു
മാരുടേയും വൈദിക കൗൺസിലിന്റേയും കസ്റ്റഡിയിലിരുന്ന് സ്വാഭാവിക മരണം വരിക്കാൻ ഞങ്ങള
നുവദിക്കില്ല. ഭാവിയിൽ ഒരാളും പൊതു സ്വത്ത് ഇത്തരത്തിൽ യാതൊരു വിധ accountability യും ഇല്ലാതെ പെരുമാറി ,
വ്യവസ്ഥാപിത സ്ഥാപ
നങ്ങളെ അധാർമ്മിക
തയുടെ ഇടങ്ങളാക്കി മാറ്റാതിരിക്കുവാനാണ് ഞങ്ങൾ യത്നിക്കുന്നത്.

ജോസഫ്തേനമ്മക്കൽ.